პარლამენტის დამოუკიდებელი დეპუტატები ჯონდი ბაღათურია და პეტრე მამრაძე მზად არიან ჯაშუშობის ბრალდებით დაკავებულ ფოტორეპორტიორებს თავდებად დაუდგნენ.
როგორც დღეს პარლამენტში გამართულ შეხვედრაზე "ქართული დასის" ლიდერმა ჯონდი ბაღათურიამ განაცხადა, სერიოზული ეჭვი არსებობს იმისა, რომ ფოტორეპორტიორებმა არა სამშობლოს, არამედ "ნაციონალურ მოძრაობას" უღალატეს.
„ისინი არა საკუთარი პროფესიული საქმიანობისთვსი და სამშობლოს, არამედ მმართველი გუნდის ღალატისთვსი სიჯებიან", - განაცხადა ბაღათურიამ.
მამრაძის თქმით, ფოტორეპორტიორების მიმართ წაყენებული ბრალდება მხოლოდ შეთითხნილია, რაც მისთვის, ინფორმაციის გასვლის პირველი წუთებიდანვე ცხადი იყო.
"ყველაფერი ისე მოხდა, როგორც 30-იან წლებში ხდებოდა" - დასძინა პეტრე მამრაძემ.
დღევანდელ "ქართული დასის" მიერ ორგანიზებულ შეხვედრას არასამთავრობო ორგანიზაციები "კონსტიტუციის 42-ე მუხლი", "კავკასიის ქალთა ქსელი", "ადამიანის უფლებათა პრიორიტეტი", სტუდია "რე" და მედია ჰოლდინგ "ალიას" წარმომადგენელი დიმიტრი ტიკარაძე ესწრებოდნენ.
