ავტოსაგზაო შემთხვევა მოხდა გურჯაანში, ლაგოდეხი - აფენი - გურჯაანის ავტომაგისტრალზე. მსუბუქი ავტომანქანა ხევში გადავარდა. ავტოსაგზაო შემთხვევის შედეგად ერთი ადამიანი, 70 წლის ქალი დაიღუპა, ორი დაშავდა.
როგორც "ჯი-ეიჩ-ენს" კახეთის საინფორმაციო ცენტრიდან აცნობეს, მძღოლი გურჯაანის რაიონულ საავადმყოფოშია მოთავსებული, მეორე ქალბატონი კი კატასტროფის მედიცინის ცენტრის ბრიგადამ თბილისში, ღუდუშაურის კლინიკაში გადაიყვანა.
ავადმყოფის თბილისში გადაყვანამდე მცირე ინციდენტი მოხდა გურჯაანის საავადმყოფოში. მთავარმა ექიმმა გელა ორველაშვილმა დაშავებულის მეუღლეს უთხრა, რომ პაციენტს მანამ ვერ გადაიყვანდნენ თბილისში, სანამ ადგილობრივი საავადმყოფოს რეანიმაციულ განყოფილებას მომსახურების თანხას 324 ლარს არ გადაუხდიდა. ვითარება მას შემდეგ განიმუხტა, რაც საქმეში ადგილობრივი ხელისუფლების ხელმძღვანელები ჩაერივნენ.
კატასტროფის მედიცინის ცენტრი გურჯაანში გამოძახებიდან 6 საათში ჩავიდა. კატასტროფის ცენტრის ექიმებმა ავადმყოფის ოჯახის წევრებს აუხსნეს, რომ ღუდუშაურის კლინიკაში ავადმყოფს იმ შემთხვევაში გადაიყვანდნენ, თუ კომპიუტერული ტომოგრაფიისთვის 200 ლარს, ხოლო დღე - ღამის განმავლობაში 500 ლარს გადაიხდიდნენ. პაციენტის ახლობლებმა აღნიშნეს, რომ სახლს გაყიდიან და თანხას გადაიხდიან. დაშავებულ ქალბატონს სამედიცინო დაზღვევა არ აქვს.
ექიმების ინფორმაციით, ამჟამად ორივე დაშავებულის მდგომარეობა მძიმეა, თუმცა სტაბილური. პაციენტებს ქალა - ტვინის დახურული ტრავმა, მოტეხილობები და დაჟეჟილობები აქვთ.
