"ის, ვინც ეკლესიას ებრძვის და ამცირებს, აუცილებლად დაისჯება", - ამის შესახებ სამების საკათედრო ტაძარში საკვირაო ქადაგების დროს უწმინდესმა და უნეტარესმა, სრულიად საქართველოს კათალიკოს-პატრიარქმა, მცხეთა-თბილისის მიტროპოლიტმა და ცხუმ-აფხაზეთისა და ბიჭვითნის მთავარეპისკოპოსმა ილია მეორემ განაცხადა.
"ზოგიერთი ჩვენგანი ჩავარდნილია ამპარტავნებაში. ზოგიერთი ფიქრობს, რომ მისი ნათქვამი სწორია, სხვის კი არა, ზოგიერთი ასწავლის სხვას, იმ დროს, როდესაც თავისთვის არ უსწავლია. გვახსოვდეს, რომ ჩვენი მფარველი არის წმინდა მართლმადიდებლური სამოციქულო ეკლესია. ხშირია, როდესაც ეკლესიას ებრძვიან და ამცირებენ. ვინც ეკლესიას დაამცირებს, აუცილებლად დაისჯება. ეკლესია წმინდაა, რადგან არის სხეული "წმინდისა ჩვენისა იესო ქრისტესი", - ბრძანა პატრიარქმა ქადაგებისას.
მისი თქმით, სულიერი წინსვლა უნდა ხდებოდეს ეკლესიაში, ეკლესია ერს დაიფარავს და დაიცავს.
"უფალი დაგვიცავს და დაგვიფარავს ხილული და უხილავი მტრისგან. ისტორიულად, ეკლესია მუდამ იცავდა საქართველოს, ეკლესია იყო და არის უდიდესი ძლიერი ძალა და ეს ძალა არ არის მიმართული ვინმეს წინააღმდეგ, ეს ძალა არის იმისთვის, რომ ადამიანი იყოს ბედნიერი. ამიტომ ეკლესიას უნდა გავუფრთხილდეთ და უნდა იყო ჩვენს გულსა და გონებაში", - ბრძანებს ილია მეორე.
პატრიარქმა ქადაგების დროს აღნიშნა, რომ თუ ადამიანს ეკლესია დაუნგრევია და შეურაცხყოფა მიუყენებია, მისი ოჯახი და სახლი დანგრეულია.
"ჩვენ უნდა ვილოცოთ იმისთვის, რომ ხელისუფლებასა და ერს შორის მშვიდობა იყოს. შევთხოვ უფალს, მოგვცეს ძალი თვისი და აღამაღლოს ერი ჩვენი", - აღნიშნა პატრიარქმა.
