ექსპერტ სოსო ცისკარიშვილის შეფასებით, "კალათბურთის სასახლეში" მოწყობილი შეკრება "ოპოზიციური ექვსიანის" მხარდასაჭერად, შესაძლოა, "მარაოების რევოლუციის" დასაბამი გახდეს. ამის შესახებ ექსპერტმა "ექვსიანის" მიერ სამოქალაქო მოძრაობა "არჩევნის თავისუფლებისთვის" პრეზენტაციაზე სიტყვით გამოსვლისას განაცხადა.
"დამებადა აზრი, რომ ეს გახდება დასაბამი მშვიდობიანი "მარაოების რევოლუციისა". აქვე მინდა ვთქვა, რომ "ზოგი ჭირი მარგებელია" და აქ ექვსი მასპინძლის ნაცვლად რვა რომ ყოფილიყო, ალბათ, სუნთქვასაც ვერ შევძლებდით", - მიმართა შეკრებილებს ცისკარიშვილმა.
მისი შეფასებით, "ოპოზიციურმა ექვსიანმა" საკუთარ თავზე ძალიან დიდი პასუხისმგებლობა აიღო, როდესაც საარჩევნო გარემოს გაუმჯობესებაზე ბრძოლა, საარსებო გარემოს გაუმჯობესებით ჩაანაცვლა.
"ლინკონს აქვს ნათქვამი, რომ "საარჩევნო ბიულეტენი ტყვიაზე ძლიერიაო". ეს კარგად იცის ჩვენმა ამერიკაში განათლებამიღებულმა ხელისუფლებამ. სწორედ ამიტომ ხდება, რომ ისინი საარჩევნო გარემოს გაუმჯობესებას არასერიოზულად უდგებიან და აბუჩად იგდებენ", - დასძინა ექსპერტმა.
