საქართველო ახალი გადამცემი ხაზით ელექტროენერგიას ირანს მიაწვდის. ახალი გადამცემი ხაზი ერთმანეთთან დააკავშირებს მარნეულის ქვესადგურს (საქართველოს ტერიტორიაზე), სადაც აშენდება 400კვ-ის ფრთა, რაზდანის ელექტროსადგურთან (სომხეთის ტერიტორიაზე) და ასევე 400კვ. ფრთა. გადამცემი ხაზი მოემსახურება საქართველოში წარმოებული ელექტროენერგიის სომხეთის გავლით ირანში გადადინებას. საქართველოს ტერიტორიზე ხაზი 40 კმ სიგრძის იქნება და მშენებლობა 2014 წლის დასაწყისისთვის დასრულდება.
სსე-ს ინფორმაციით, "საქართველოს სახელმწიფო ელექტროსისტემის" წარმომადგენლები, მმართველთა საბჭოს თავმჯდომარის, სულხან ზუმბურიძის ხელმძღვანელობით სამუშაო ვიზიტით სომხეთში იმყოფებოდნენ. ვიზიტის ფარგლებში ხელი მოეწერა საქართველო-სომხეთის დამაკავშირებელი ახალი 400 კვ. გადამცემი ხაზის მშენებლობის შესახებ შეთანხმების იურიდიული შინაარსის ცვლილებებს. თავად შეთანხმებას 2010 წლის 26 იანვარს მოეწერა ხელი. ცვლილებებს საქართველოს მხრიდან ხელი მოაწერა "საქართველოს სახლმწიფო ელექტროსისტემის" მმართველთა საბჭოს თავმჯდომარემ სულხან ზუმბურიძემ, სომხეთის მხრიდან სომხეთის ელექტროსისტემის ოპერატორი კომპანიის გენერალურმა დირექტორმა მნაცაკან მნაცაკანიანმა და სომხეთის მაღალი ძაბვის ქსელის დირექტორმა სააკ აბრამიანმა.