ვოლგოგრადში შესაძლოა აფხაზ სეპარატისტთა ლიდერის სერგეი ბაღაფშის სახელობის ქუჩა გაჩნდეს. ამ მოთხოვნით გამოვიდნენ ვოლგოგრადის ქუჩაში იქ მოქმედი ახალგაზრდული მოძრაობის "ნოვიე ლიუდის" აქტივისტები. ინფორმაციას ამის შესახებ რუსული მედია ავრცელებს.
"ჩვენ გამოვდივართ ინიციატივით ლენინის სახელობის ქუჩას გადაერქვას სახელი და მას სერგეი ბაღაფშის სახელი ეწოდოს. მიგვაჩნია, რომ მან ბევრი რამ გააკეთა რუსეთსა და აფხაზეთს შორის ურთიერთობების ნორმალიზებისთვის. ამ მოღვაწის ხსოვნა უნდა უკვდავყოთ და ქუჩას მისი სახელი უნდა მივანიჭოთ", _ აცხადებენ ორგანიზაციის წევრები.
აღსანიშნავია, რომ აღნიშნული აქციის გამართვისას, მონაწილეებს ხელში ეკავათ შემდეგი შინაარსის პლაკატები: "უკვდავვყოთ ბაღაფშის სახელი!", ""რუსეთს ახსოვს სერგეი ბაღაფში!". ამას გარდა, მონაწილეები ლენინის ქუჩაზე გამწკრივდნენ მათ ხელში ასევე ეკავათ წარწერები "სერგეი ბაღაფშის ქუჩა № ...".
აღსანიშნავია, რომ აქციის ხელმძღვანელებმა რუსი ჟურნალისტის კითხვას - კონკრეტულად რა კავშირი აქვს სერგეი ბაღაფშს ვოლგოგრადთან და რატომ უნდა იყოს რუსეთის სწორედ ამ ქალაქში მისი სახელობის ქუჩა" - პასუხი ვერ გასცეს.
