ევროკავშირის წარმომადგენლობის ხელმძღვანელ, ფილიპ დიმიტროვის შეფასებით, წამებისა და ადამიანის უფლებების ხელყოფის საწინააღმდეგოდ საქართველოში ხელისუფლებამ რიგი მნიშვნელოვანი ღონისძიება გაატარა, რისი პოზიტიური სიგნალებიც სახეზეა.
"რაც არ უნდა არსებობდეს მიზეზი, ადამიანის უფლებების დაცვა უპირველესია. ეს არის საბაზისო, ევროპის სტანდარტებისა და ფასეულობების ყველაზე მნიშვნელოვანი ნაწილი. რასაკვირველია, ყველას გვესმის, რომ სამყაროში ყველაფერი კარგად არ არის და ადგილი აქვს დარღვევებს. ამ მიმართულებით საქართველოში გარკვეული პოზიტიური სიგნალები ნამდვილად სახეზეა. წამების პრევენციის კომიტეტის დასკვნაშიც წერია, რომ ამ კუთხით სახალხო დამცველის მუშაობა ძალიან ეფექტურია და რომ ქვეყანაში არსებობს ეროვნული პრევენციის მექანიზმი, რომელიც, რეალურად, მუშაობს", - განაცხადა ელჩმა დღეს, სასტუმრო „ქორთიარდ-მარიოტში", სახელწოდებით „მსოფლიო წამების გარეშე" გამართულ კონფერენციაზე.
მისივე განმარტებით, ციხის ახალი კოდექსის მიღების შემდეგ გარკვეული გაუმჯობესებაც შეინიშნება პენიტენციალური სისტემის ინფრასტრუქტურაშიც და „თუ გავითვალისწინებთ იმას, თუ რა პირობები არსებობდა აქამდე, ეს ძალიან მნიშვნელოვანია".
„უნდა ითქვას, რომ საქართველოში ამჯამად მუშავდება პოლიტიკა, რომელიც მიმართულია პენიტენციალური სისტემის შიგნით მოქცეული ადამიანების უფლებების დაცვაზე. ასევე, გათვალისწინებულია სისხლის სამართლის კოდექსის გადასინჯვა. ეს მისასალმებელია", - აღნიშნა ფილიპ დიმიტროვმა.
ამასთან, ევროკავშირის წარმომადგენლობის ხელმძღვანელის თქმით, მიუხედავად იმისა, რომ წამებისა და ადამიანის უფლებების ხელწყოფის წინაარმდეგ მთელი რიგი ღონისძიება გატარდა, პრობლემები მაინც რჩება.
„მიუხედავად იმისა, რომ ზოგიერთ საპყრობილეში გაუმჯობესდა ვითარება, რიგ დაწესებულებაში რთული მაინც ძალიან ცუდია, მათ შორის ინფრასტრუქტურის თვალსაზრისით. ასევე არსებობს სამედიცინო დახმარების ხელმიუწვდომელობის პრობლემა. ძალიან ბევრი რამ ჯერ კიდევ გასაკეთებელია - განსაკუთრებით დახურული ტიპის დაწესებულებებში და მათ შორის ფსიქიატრიულ დაწესებულებებში. უმთავრესია, არსებობდეს ქმედითი გამოძიება და დაუყოვნებლივი რეაგირება არასათანადო მოპყრობისა და წამების ნებისმიერ ფაქტზე და რაც ყველაზე მთავარია, ეს უნდა განხორციელდეს დროულად. ეს არის ერთადერთი გზა, რაც საშუალებას მოგვცემს მართლმსაჯულება იყოს სათანადო დონეზე და წამების მსხვერპლს ჰქონდეს საშუალება მიიღოს მორალური შვება თუ მატერიალური კომპესანცია", - განაცხადა ელჩმა.
სიტყვით გამოსვლის ბოლოს ფილიპ დიმიტროვმა ევროკავშირის სახელით იმედი გამოთქვა, რომ აღნიშნული მიმართულებით პოზიტიური პრაქტიკის დამკვიდრება საქართველოში მომავალშიც გაგრძელდება.
სასტუმრო "ქორთიარდ მარიოტში" დღეს, რიგით მე-7 კონფერენცია "მსოფლიო წამების გარეშე" გაიმართა. მასზე .
წარმოდგენილი იყო აქტუალური საკითხები, ანგარიშები და გაიმართა მსჯელობა დაუსჯელობისა და წამების კრიმინალიზაციის საკითხების პრიორიტეტულობასა და გადაჭრის გზებზე. შემუშავებული რეკომენდაციები დეკლარაციის სახით გაეგზავნება წამების საწინააღმდეგო უწყებათაშორის საბჭოსა და სხვა პასუხისმგებელ სამთავრობო უწყებებს.
კონფერენციის ორგანიზატორები საქართველოს სახალხო დამცველი და წამების მსხვერპლთა რეაბილიტაციის ცენტრი „ემპათია" იყვნენ.
