საქართველოს მთავრობა უფლებამოსილია საერთაშორისო საწარმოს კანონმდებლობით შეზღუდული საქმიანობის უფლება მისცეს.
აღნიშნულთან დაკავშირებით "საგადასახადო კოდექსში" ცვლილებები პარლამენტმა უკვე დაამტკიცა.
მიღებული გადაწყვეტილებით, საერთაშორისო საწარმოს ფუნქციონირების და საინვესტიციო პროექტების განხორციელების ხელშეწყობის მიზნით საქართველოს პრემიერ-მინისტრი ქმნის სამთავრობო საბჭოს, რომელიც შეიმუშავებს წინადადებებს საერთაშორისო საწარმოსთვის, სტატუსის გაუქმების გარეშე კანონმდებლობით შეზღუდული საქმიანობის უფლების მინიჭების მიზანშეწონილობის თაობაზე.
სამთავრობო საბჭოს მიერ წარდგენილი წინადადების საფუძველზე საქართველოს მთავრობა უფლებამოსილია საერთაშორისო საწარმოს მისცეს კანონმდებლობით შეზღუდული საქმიანობის უფლება, საერთაშორისო საწარმოს გაუქმების გარეშე. ამ შემთხვევაში საქართველოს მთავრობას უფლება აქვს დააწესოს ტარიფი და განსაზღვროს მისი ოდენობა.
საერთაშორისო საწარმოს მიერ კანონმდებლობით რეგისტრირებული გადასახადის გადამხდელისთვის საქონლის მიწოდებით მიღებული მოგების დაბეგვრის მიზნებისთვის საერთაშორისო საწარმო ასეთ მიწოდებით მიღებული შემოსავლიდან ხარჯებს გამოქვითავს, ერთობლივ შემოსავალში ამ შემოსავლის ხვედრითი წილის პროპორციულად.
