სახერხი დანადგარების განთავსება/მონტაჟი გარკვეულ ადგილებში აიკრძალა.
აღნიშნულთან დაკავშირებით ენერგეტიკისა და ბუნებრივი რესურსების მინისტრის ბრძანება უკვე გამოიცა.
ბრძანების თანახმად, სახერხი დანადგარების განთავსება/მონტაჟი იკრძალება სახელმწიფო ტყის ფონდის ტერიტორიაზე; დაცულ ტერიტორიაზე (გარდა სახელმწიფო ტყის ფონდის ტერიტორიაზე არსებული დაცული ლანდშაფტის, მრავალმხრივი გამოყენების ტერიტორიისა და ბიოსფერული რეზერვატისა).
ასევე სახერხი დანადგარების მონტაჟი აკრძალულია მდინარის კალაპოტის, ხევის ან მაგისტრალური სარწყავი არხის კიდიდან ორივე მხარეს - 50 მეტრის ფარგლებში, ხოლო მაღალმთიან რეგიონებში ნარჩენების განთავსების ტერიტორიის შემოღობილი ნაწილიდან 20 მეტრის ფარგლებში; ტბებისა და წყალსაცავების წყალდაცვითი ზოლის ფარგლებში; შავი ზღვის სანაპირო ზოლის ფარგლებში.
