კერძო საგადასახადო ინსპექტორს საკონტროლო შესყიდვის განხორციელების უფლება ექნება.
აღნიშნულთან დაკავშირებით ფინანსთა მინისტრის ბრძანება უკვე გამოცა, რომლის თანახმადაც, კერძო საგადასახადო ინსპექტორი უფლებამოსილია განახორციელოს საკონტროლო შესყიდვა შემდეგი საგადასახადო სამართალდარღვევების გამოვლენის მიზნით: მომხმარებელთან ნაღდი ფულით ანგარიშსწორებისას საკონტროლო-სალარო აპარატის გარეშე მუშაობა; მომხმარებელთან ნაღდი ფულით ანგარიშსწორებისას საკონტროლო-სალარო აპარატის გამოუყენებლობა; ჩეკში ფაქტობრივად გადახდილზე ნაკლები თანხის ჩვენება; გადასახადის გადამხდელად აღრიცხვის საქართველოს კანონმდებლობით დადგენილი წესის დარღვევა.
ამასთან, კერძო საგადასახადო ინსპექტორი საკონტროლო შესყიდვას ახორციელებს საკუთარი სახსრებით როგორც ნაღდი, ასევე უნაღდო ანგარიშსწორებით და საკონტროლო შესყიდვისას გადახდის საშუალებად ეროვნულ ვალუტას გამოიყენებს.
კერძო საგადასახადო ინსპექტორმა საკონტროლო შესყიდვის განხორციელებისთანავე გადასახადის გადამხდელს უნდა წარუდგინოს შემოსავლების სამსახურის მიერ გაცემული კერძო საგადასახადო ინსპექტორის მოწმობა.
საგადასახადო სამართალდარღვევის გამოვლენის შემთხვევაში, კერძო საგადასახადო ინსპექტორი საგადასახადო სამართალდარღვევის ოქმს შეადგენს და ვალდებულია, რომ ეს ოქმი პროცედურის განხორციელებიდან არა უგვიანეს მე-2 სამუშაო დღისა, საგადასახადო ორგანოში წარადგინოს.
