EBRD-ი 1 მილიონი აქციის გამოშვებით, საწესდებო კაპიტალს 10 მილიარდი ევროთი ზრდის. აქედან 1 მილიარდი ევრო წარმოადგენს paid-in სააქციო კაპიტალს, ხოლო 9 მილიარდი ევრო callable კაპიტალს. ერთი აქციის ღირებულება შეადგენს 10 ათას ევროს. საქართველოს მთავრობა მზადაა ქვეყნის წილი EBRD-ის callable კაპიტალში 900 აქციით გაიზარდოს, რაზეც შეთავაზება ქვეყანამ EBRD-დან უკვე მიიღო.
EBRD-ს მმართველთა საბჭოს № 126 რეზოლუციის შესაბამისად, ბანკის paid-in კაპიტალი, ახალი paid-in აქციის გამოშვების შედეგად, 1 მილიარდი ევროთი უკვე გაიზარდა.
შესაბამისად, ახალი paid-in აქციები წევრ ქვეყნებს შორის, საერთო კაპიტალში არსებული წილების მიხედვით, პროპორციულად განაწილდა. paid-in კაპიტალის ნაწილში საქართველოს წილი 101 აქციით გაიზარდა. paid-in კაპიტალის გაზრდა არ საჭიროებს რაიმე დამატებით ქმედებას ან ფინანსურ კონტრიბუციას წევრი ქვეყნების მხრიდან, ვინაიდან კაპიტალის ფაქტიური გაზრდა განხორციელდა ბანკის საკუთარი რეზერვებიდან თავისუფალი ფულადი სახსრების (net income) ბანკის კაპიტალში რეპატრიაციის საშუალებით.
ხოლო რაც შეეხება EBRD-ის მმართველთა საბჭოს № 128 რეზოლუციას, ის ბანკის callable კაპიტალის გაზრდას 9 მილიარდი ევროთი ითვალისწინებს, რომლის ფარგლებშიც 900 ათასი ახალი callable აქციის გამოშვება მოხდება.
საქართველოს მხრიდან თანხმობის შემთხვევაში საქართველოს წილი EBRD-ის callable კაპიტალში გაიზრდება 900 აქციით, რაც ერთი აქციის ღირებულების გათვალისწინებით შეადგენს 9 მლნ. ევროს. ამის შედეგად, შენარჩუნებული იქნება საქართველოს არსებული წილი EBRD-ის საწესდებო კაპიტალში.
ამასთან, callable კაპიტალში მონაწილეობა ამჟამად არ საჭიროებს ფულად კონტრიბუციას წევრი ქვეყნების მხრიდან და შესაბამისად არ გამოიწვევს საქართველოს პირდაპირი ფინანსური ვალდებულებების ზრდას. Callable კაპიტალის ფარგლებში წევრი ქვეყნებისთვის ფინანსური ვალდებულება შესაძლოა წარმოიშვას მხოლოდ ბანკის მოთხოვნის საფუძველზე და იმ პირობით, რომ არ იარსებებს EBRD-ის მიერ მიღებული ზარალის ან EBRD-ის სხვა ვალდებულებების დაფარვის ალტერნატიული საშუალება.
