ვიცე პრემიერ-მინისტრი გიორგი ბარამიძე სამუშაო ვიზიტით ბრიუსელში იმყოფება, სადაც ნატო-ს სამხედრო კომიტეტის ხელმძღვანელ ადმირალ ჯამპაულო დიპაულას შეხვდა.
შეხვედრაზე ადმირალმა ჯამპაულო დიპაულამ მაღალი შეფასება მისცა ქართველი სამხედროების მონაწილეობას ავღანეთში და აღნიშნა, რომ ნატო აფასებს საქართველოს წვლილს საერთაშორისო უსაფრთხოების უზრუნველყოფის ძალების (ISAF) ოპერაციაში, რისთვისაც მან ქართულ მხარეს მადლობა გადაუხადა. შეხვედრაზე მხარეებმა ისაუბრეს საქართველოს თავდაცვის რეფორმაზე, სამშვიდობოებისათვის საქართველოში საერთაშორისო მოსამზადებელი ცენტრის შექმნაზე და აღინიშნა, რომ იმის მიუხედავად, რომ რუსეთი არ ასრულებს ცეცხლის შეწყვეტის შეთანხმებით ნაკისრ ვალდებულებებს, საქართველო აგრძელებს თავისი შეიარაღებული ძალების ნატო-ს სტანდარტებთან მიახლოვებას. შეხვედრის დასასრულს საუბარი შეეხო ადმირალი ჯამპაულო დიპაულას საქართველოში ვიზიტს, რომელიც ნოემბერში დაგეგმილი ჩრდილოატლანტიკური ალიანსის საბჭოს ვიზიტის ფარგლებში შედგება.
ვიზიტის ფარგლებში გიორგი ბარამიძემ, ასევე შეხვედრა გამართა ნატო-ს გენერალური მდივნის სპეციალურ წარმომადგენელთან კავკასიასა და ცენტრალურ აზიაში ჯეიმს აპატურაისთან. შეხვედრაზე ისაუბრეს საქართველოს ნატო-ში გაწევრიანების მთავარი ინსტრუმენტების წლიური ეროვნული პროგრამისა (ANP) და ნატო-საქართველოს კომისიის(NGC) უფრო ეფექტურად გამოყენების მნიშვნელობაზე და აღინიშნა, რომ საქართველომ უნდა გააგრძელოს წლიური ეროვნული პროგრამით გათვალისწინებული რეფორმები ყველა მიმართულებით.
