დღეს, 18 მაისს, საქართველოს ლატვიის სეიმის დელეგაცია ეწვევა. ვიზიტის ფარგლებში საგარეო ურთიერთობათა კომიტეტის თავმჯდომარე ოიარს ერიკს კალნინსი და კომიტეტის წევრები პირველ შეხვედრებს საქართველოს პარლამენტში, ჯერ კოლეგებთან გამართავენ, შემდეგ კი მათ საკანონმდებლო ორგანოს თავმჯდომარე დავით ბაქრაძე მიიღებს.
18 მაისსვე ლატვიელი სტუმრები შეხვედრებს საქართველოს საგარეო საქმეთა სამინისტროში, ეროვნული უშიშროების საბჭოს მდივან გიორგი ბოკერიასთან, რეინტეგრაციის საკითხებში სახელმწიფო მინისტრ ეკა ტყეშელაშვილთან და თავდაცვის მინისტრ ბაჩო ახალაიასთან გამართავენ. ლატვიის სეიმის დელეგაციის წევრები ასევე საქართველოს სტრატეგიული და საერთაშორისო კვლევების ფონდის ოფისში არასამთავრობო ორგანიზაციების წარმომადგენლებს შეხვდებიან.
19 მაისს ლატვიელი პარლამენტარები დემოკრატიათა თანამეგობრობის საპარლამენტო ფორუმში მიიღებენ მონაწილეობას, რის შემდეგაც დაგეგმილია შეხვედრა საპარლამენტო ოპოზიციის წარმომადგენლებთან.
20 მაისს სტუმრები ევროკავშირის სადამკვირვებლო მისიის ოფისს ესტუმრებიან და ევროკავშირის სადამკვირვებლო მისიის წარმომადგენლებთან გამართავენ შეხვედრას. დღის მეორე ნახევარში წეროვანში გაემგზავრებიან და იძულებით გადაადგილებულ პირთა დასახლებას დაათვალიერებენ, საიდანაც ცხინვალის რეგიონის ადმინისტრაციული სასაზღვრო ზონის მონახულებაა დაგეგმილი. ამავე დღეს ლატვიის სეიმის წარმომადგენლები მცხეთას ესტუმრებიან და ქალაქის ღირსშესანიშნაობებს (ჯვრის მონასტერი, სვეტიცხოვლის ტაძარი) დაათვალიერებენ.
ლატვიელი პარლამენტარები თბილისს 21 მაისს დატოვებენ.
