როგორც საქართველოს ადვოკატთა ასოციაციის თავმჯდომარემ შალვა ხაჭაპურიძემ აღნიშნა, ადვოკატები ქვეყანაში სამართლის არ არსებობას აპროტესტებენ. აქცია პერმანენტუილი იქნება და შესაძლოა, იმდენ ხანს გასტანოს, რამდენსაც გარემოება მოითხოვს.

ხაჭაპურიძის თქმით, აქცია შეზღუდული არ არის. ამდენად, შესაძლოა, მათ შეუერთდნენ სხვა პოლიტიკური და საზოგადოებრივი ძალები. ამასთან, აქცია სანქცირებულია, რისთვისაც ადვოკატთა ასოციაციამ ქალაქის მერიას განცხადებით ჯერ კიდევ 13 მაისს მიმართა და ნებართვის ვადა 1 თვით მიიღეს.

ადვოკატთა საპროტესტო აქცია 21 მაისამდე გაგრძელდება. თუ მათი მოთხოვნები არ დაკმაყოფილდება, ადვოკატები 21 მაისს დაგეგმილ ოპოზიციის საპროტესტო აქციას შეურთდებიან.

ამასთან, ისინი სპეციალური მოთხოვნით მიმართავენ საქართველოს პრეზიდენტს, პარლამენტისა და უზენაესი სასამართლოს თავმჯდომარეებს.

კერძოდ, ადვოკატთა ვრცელი მოთხოვნა შემდეგი საკითხებისგან შედგება:
სამართლიანი სასამართლოს უფლება, თანამდებობიდან გათავისუფლდნენ გირგვლიანის საქმის განხილვაში მონაწილე მოსამართლეები, მათ შორის გიორგი ჩემია. გამოიძიონ ქუჩაში ჩაცხილული ახალგაზრდების საქმე, გამოძიებულ იქნას ჟვანიას, პატარკაციშვილის, კლიმიაშვილის, შარაძის, სანაიას საეჭვო გარემოებაში დაღუპვის საქმეები, აშშ-ის სახელმწიფო დეპარტამენტის 2010 წლის დასკვნის მიხედვით, დაიწყოს სისხლის სამართლებრივი დევნა ელიტარულ კორუფციაზე, შეწყდეს უდანაშაულო ადვოკატთა დევნა-დაპატიმრება, აღდგეს 50-ე და 55-ე მუხლები, რომელიც მოსამართლეთა დამოუკიდებლობას შეეხება, საქართველოს კანონმდებლობა და კონსტიტუცია შესაბამისობაში მოვიდეს ევროსაბჭოსა და გაეროს კონვენციასთან. გათავისუფლდნენ პოლიტპატიმრები, უკანონო პატიმრებთან დაკავშირებით შეიქმნას საზოგადოებრივი კომისია, შეწყდეს პატიმართა მკვლელობა-წამება, გათავისუფლდეს სასამართლო სამედიცინო და ფსიქიატრიული ექსპერტიზა პროკურატურის ზეგავლენისგან, დროებით ვადამდელი გათავისუფლების საკითხი განიხილოს სასამართლომ. გამოცხადდეს ფართომასშტაბიანი ამნისტია და მასმედია ხელისუფლების დევნისგან გათავისუფლდეს.