ცვლილების სახალხო განხილვაში მონაწილეობის მიღებაზე უარი ორმა ოპოზიციონერმა დეპუტატმა დიმიტრი ლორთქიფანიძემ და გიორგი ცაგარეიშვილმა განაცხადეს.
პარლამენტის პლენარულ სხდომაზე, კომისიის შექმნასთან დაკავშირებით დადგენილების პროექტი პირველად "თავისუფალი დემოკრატების" წევრმა დეპუტატმა გიორგი ცაგარეიშვილმა გააპროტესტა და განაცხადა, რომ მასთან კონსულტაციები არ ყოფილა და ისე შეიყვანეს კომისიის შემადგენლობაში.
სხდომაზე კომისიის შემადგენლობიდან საკუთარი თავის ამოღება ფრაქცია "ძლიერი საქართველოს" წევრმა დიმიტრი ლორთიფანიძემაც მოითხოვა, რომელმაც ასევე აღნიშნა, რომ სიაში ისიც კონსულტაციის გავლის გარეშე მოხვდა.
მისი თქმით, თავის დროზე მან მხარი არ დაუჭირა ახალ კონსტიტუციას და შესაბამისად, ვერც მასში ცვლილება იქნება მისთვის მისაღები.
შეგახსენებთ, რომ საკონსტიტუციო ცვლილებაზე, პარლამენტის რეგლამენტის თანახმად, უნდა შეიქმნას საყოველთაო-სახალხო განხილვის კომისია, რომელიც ცვლილებაზე იმუშავებს, დასკვნას მოამზადებს და პარლამენტს წარუდგენს. ამის შემდეგ საკონსტიტუციო ცვლილების განხილვა უკვე პარლამენტმა უნდა დაიწყოს. კომისია პარლამენტის, აღმასრულებელი ხელისუფლების და სამეცნიერო საზოგადოებში წევრებისგან კომპლექტდება. ასევე, მასში უმრავლესობით უნდა იყვნენ წარმოდგენილები ოპოზიციის წევრები.
კანონმდებლობის მოთხოვნით, საყოველთაო-სახალხო განხილვის კომისიაში ოპოზიცია უმრავლესობით უნდა იყოს წარმოდგენილი, თუმცა, პარლამენტის რეგლამენტი უშვებს გამონაკლის იმ შემთხვევაში თუ ამ თანაფარდობით კომისიის დაკომპლექტება ვერ ხერხდება.
აღნიშნულ კომისიის შემადგენლობას პარლამენტი დღეს დაამტკიცებს.
საქართველოს კონსტიტუციაში ცვლილება პარლამენტის ადგილსამყოფელთან დაკავშირებით შედის. პარლამენტის ადგილსამყოფელად 2012 წლის საპარლამენტო არჩევნების შემდეგ, მხოლოდ ქუთაისი იქნება.