საპარლამენტო უმრავლესობა ოპოზიციას კონსულტაციების გავლას სპეციალისტებთან ურჩევს და არა "მეტროში პირველივე შემხვედრთან". ამის შესახებ საპარლამენტო უმრავლესობის წევრმა, ჯანდაცვის საპარლამენტო კომიტეტის თავმჯდომარის მოადგილემ გიორგი გოდაბრელიძემ დღეს პლენარულ სხდომაზე გამოსვლისას "ქრისტიან-დემოკრატების" საპასუხოდ განაცხადა.
გოდაბრელიძის გაუგებარია, საიდან მოიტანა ანიკაშვილმა სტატისტიკა, რომლის მიხედვითაც ექიმების 80% უმუშევრად არის დარჩენილი.
"საიდან გაქვთ ეს სტატისტიკა, ვინ გითხრათ, სად წაიკითხეთ? რამდენი ექიმია ჯამში დღეს და რამდენია მათი 80 პროცენტი? რამდენჯერმე გთხოვეთ, რომ ნუ ასახელებთ პროცენტებს, რადგან შემდგომ რომ დავითვლით, აბსურდამდე მივალთ და უხერხულ მდგომარეობაში აღმოჩნდებით", - მიმართა დეპუტატმა ანიკაშვილს.
ამასთან, გოდაბრელიძემ აღნიშნა, რომ კვალიფიციური ექიმი პირიქით, საძებარია და მას შემდეგ, როცა მთელი რიგი პროექტები დასრულდება, კიდევ ზუსტად გახდება ცნობილი, თუ რამდენი ექიმია დამატებით საჭირო.
"დღეს არათუ არც ერთი ექიმი არ რჩება უმუშევრად და "ჰაერში", არამედ მათთვის ევროპული სტანდარტების შეთავაზება ხდება. ცუდია, რომ ნახევარ სიმართლეს საუბრობთ. ეს ხშირად ტყუილზე უარესია", - განაცხადა გოდაბრელიძემ.