15 მაისს გამართულ პრესკონფერენციაზე „ქართული პარტიის" თავმჯდომარემ სოზარ სუბარმა იმ უკანონო ქმედებებზე ისაუბრა, რომელიც სამართალდამცავი სტრუქტურების წარმომადგენლებმა გუშინ ბათუმში გამართული საპროტესტო აქციის მონაწილეთა მიმართ განაახორციელეს.
სოზარ სუბარის განცხადებით, ქუთაისის სამხარეო პოლიციის სამმართველოს, ვანისა და სამტრედიის პოლიციის განყოფილებების და სოდ-ის თანამშრომლებმა (კოპალეიშვილი, ადამია, დვალიშვილი და სხვები) უსაფუძვლოდ გააჩერეს 8 ავტობუსი და მიკროავტობუსი, რომლითაც აქციის მონაწილეები სახლებში ბრუნდებოდნენ, მძღოლები დააჯარიმეს, ხოლო უამრავ მგზავრს პრობლემები შეუქმნეს.
„ქართული პარტიის" თავმჯდომარის განსაკუთრებულ პროტესტს ამ სადამსჯელო ოპერაციაში სოდ-ის თანამშრომშრომლების მონაწილეობა იწვევს, რომლებსაც საგზაო მოძრაობის წესებთან არაფერი ესაქმებათ. უმნიშვნელო დარღვევის გამო, რაც კანონმდებლობით 10 ლარიან ჯარიმას ითვალისწინებს, სამართალდამცავებმა წვიმაში, გვიან ღამით, ავტობუსიდან ჩამოყარეს მგზავრები," - აღნიშნა სოზარ სუბარმა. მისივე განცხადებით, ის და პარტიის სხვა ლიდერები დროულად რომ არ მისულიყვნენ შემთხვევის ადგილზე და პროტესტის ნიშნად, ავტომაგისტრალი არ გადაეკეტათ, „ქართული პარტიის" მრავალ მხარდამჭერს დაუსახლებელ ადგილას დატოვებდნენ.
სოზარ სუბარმა პრესკონფერენციაზე ის შემთხვევაც გაიხსენა, როდესაც საჩხერელმა მძღოლებმა სამართალდამცავებს შესამოწმებლად საბუთები გადასცეს, მათ კი ერთი დოკუმენტი დამალეს და მძღოლს აუხირდნენ, თითქოს, მანქანის ტექნიკური დათვალიერების პასპორტი არ ჰქონდა.
„ქართული პარტიის" თავმჯდომარე ჰპირდება ყველა იმ მძღოლს, ვინც 14 მაისის აქციის დასრულების შემდეგ სამართალდამცავებმა უკანონოდ დააჯარიმეს, რომ ამ ჯარიმებს მისი პარტია გადაიხდის და ისინი მატერიალურად არ დაზარალდებიან.
„ვინაიდან ისინი ხალხს ემსახურებოდნენ და მხოლოდ ამის გამო უწევთ ფულის გადახდა, ჯარიმის დაფარვისთვის საჭირო თანხას „ქართული პარტია" გადაიხდის. არც ჩვენს თანამებრძოლებს, არც იმ ადამიანებს, რომლებიც ავტოკრატიასთან ბრძოლაში გვერდით გვიდგანან, მარტო არ დავტოვებთ", - უდანაშაულო მძღოლებს მხარდაჭერას ჰპირდება სოზარ სუბარი.
