საქართველო თურქეთთან, აზერბაიჯანთან და სომხეთთან საზღვრის გადაკვეთის პროცედურების გამარტივებაზე მუშაობს. პრემიერ-მინისტრის განცხადებით, უახლოეს პერიოდში სარფის საბაჟო-გამშვები პუნქტი ამოქმედდება, რაც საქართველო-თურქეთის საზღვრის გადაკვეთას მაქსიმალურად გაამარტივებს.
"მეზობელ ქვეყნებთან უფრო გამარტივებულ საზღვრის გადაკვეთის რეჟიმის ამოქმედებაზე ვმუშაობთ. საზღვრის გადაკვეთის პროცედურები ახლაც გამარტივებულია, მაგრამ ვფიქრობთ რომ პროცედურების კიდევ უფრო გამარტივება შეიძლება. როდესაც განახლებული სარფის საბაჟო გაიხსნება, საქართველოსა და თურქეთს შორის საზღვრის გადაკვეთა კიდევ უფრო გამარტივდება", - აცხადებს პრემიერ-მინისტრი.
ნიკა გილაურის თქმით, ანალოგიურად გამარტივდება პროცედურები ასევე საქართველო-აზერბაიჯანის და საქართველო-სომხეთის საზღვრებზეც, რისთვისაც პოლიტიკური ნება არსებობს და მუშაობაც უკვე დაწყებულია.
"ამ მიმართულებით ვმუშაობთ აზერბაიჯანთან და სომხეთთან, თუმცა რაიმე კონკრეტული ნაბიჯები ამ მიმართულებით გადადგმული არ გვაქვს, თუმცა შეთანხმება ამაზე არსებობს", - აღნიშნა პრემიერ-მინისტრმა.
