საპარლამენტო უმცირესობის ლიდერის გიორგი თარგამაძის შეფასებით, საქართველოს არა ეფექტური, არამედ დეფექტური მთავრობა ჰყავს.
"პროგრამას, რომელსაც მთავრობა დღემდე ახორციელებს ჰქვია "დეგრადაციული, დაუსაქმებლობის და ხალხის გაღატაკების" პროგრამა... თქვენ ვერ გაამართლეთ არა თუ ჩვენი იმედები, რომ დაპირებებს შეასრულებდით, არამედ თავად "ნაციონალური მოძრაობისა" და მხარდამჭერების იმედებიც. ექსპერიმენტმა, სახელწოდებით "საქართველოს მთავრობა" მარცხი განიცადა. ჩვენ გვყავს არა ეფექტური, არამედ დეფექტური მთავრობა, მთავრობა რომელიც აქამდეც უნდა გადამდგარიყო", - განაცხადა თარგამაძემ პარლამენტში, სამთავრობო დებატებისას.
მისივე განმარტებით, არსებული მთავრობის ყველაზე დიდი უბედურება ის არის, რომ ზომიერ შუალედს ვერ პოულობს - ერთი უკიდურესობიდან მეორე უკიდურესობას ვაწყდებით.
ამასთან, თარგამაძის თქმით, ერთკვირიანი სამთავრობო დებატების ფარგლებში ოპოზიონერმა დეპუტატებმა მთავრობის წევრებისა და უმრავლესობის წევრებისგან არაერთი შეურაცხმყოფელი რეპლიკა მოისმინეს, თუმცა "მოითმენენ".
"რა თქმა უნდა, პირდაპირი გაგებით დებატები ვერც კვერცხს მოგვიტანს და ვერც ბუნდღას, ვერც კვერცხს გააიაფებს და ვერდ ქათამას, მგარამ დებატებმა უნდა მოგვიტანოს ის, რაც მას მოაქვს დემოკრატიულ ქვეყნებში... ამ ერთი კვირის განმავლობაში ჩვენ ბევრი შეურაცხყოფა მოვისმინეთ ჩვენი განცხადებების გამო, ზოგიერთმა ჩვენს შუბლზე დაიწყო ძარღვების დათვლა, ზოგმა სამედიცინო პათოლოგიებში სცადა მოეძებნა ჩვენი ავადმყოფობის შემართება და წამალი, ზოგმა გარეწარი გვიწოდა, ზოგმა ნაძირალა... ჩვენ ვალდებულნი ვართ ეს ყველაფერი მოვითმინოთ, თუმცა როცა ვფიქრობდი, რა ფორმით მეპასუხა თქვენთვის, ერთი ანეკდოტი ამეკვიატა: ერთი ადამიანი მეორეს უყვება წინა დღის ამბავს და გაცხარებით ეუბნება: წარმოგიდგენიათ მთელი გუშინდელი დღის განმავლობაში სადაც კი მივედი ყველგან ყველა მთხოვდა დამემტკიცებინა, რომ აქლემი არ ვარ. მერე რა ქენი, დაუმტკიცეო? - რას ლაპარაკობ, მეტი საქმე არ მქონდა, შევაფურთხე და წამოვედიო", - ასე უპასუხა თარგამაძემ საპარლამენტო უმრავლესობისა და მთავრობის წევრთა ყველა იმ რეპლიკას, რომელიც მათი მხრიდან მთელი სამთავრობო დებატების ფარგლებში ისმოდა.
