ოპოზიციის მიზანია მხოლოდ ლაპარაკი, ხოლო ხელისუფლების საქმე ლაპარაკის ნაცვლად, - ამის შესახებ დღეს, პარლამენტის რიგგარეშე პლენარულ სხდომაზე საპარლამენტო უმრავლესობის ერთ-ერთმა ლიდერმა, პირველმა ვიცე-სპიკერმა მიხეილ მაჭავარიანმა სამთავრობო დებატების დროს განაცხადა.
"ყველა პარლამენტში დებატები არის ერთადერთი გზა, რომ ხელისუფლებამ და ოპოზიციამ თავის ხალხი დაარწმუნოს ვის უფრო სწორი გზა აქვს არჩეული, რომ თავის ქვეყანა ეკონომიკური და სოციალური გამოწვევებიდან გამოიყვანს", - აღნიშნა მაჭავარიანმა.
მისივე თქმით, ამ დებატებზე ოპოზიციას უნდა დაემტკიცებინა შესძლებდა თუ არა გარდა კრიტიკისა, საკუთარი ხედვის, პროგრამების წარმოადგენს, როგორ უნდა გამოვიდეს ქვეყანა არსებული რთული ვითარებიდან.
"ჩვენ ეს ვერ დავინახეთ. ოპოზიციამ ჩააბარა პირველი ტესტი, როგორც სკოლის მოსწავლემ და მათ შესძლეს საუბარი მხოლოდ პრობლემებზე და ჩვენმა მოქალაქეებმა ვერანაირი გზა, თუ როგორ უნდა გაუმკლავდეთ ამ პრობლემებს ვერ დაინახეს", - აღნიშნა უმრავლესობის წევრმა.
მაჭავარიანმა ასევე ოპოზიციის შეფასებისას გამოთქმები მოიშველია და აღნიშნა, რომ არსებობს გამოთქმა "ქაღალდი ყველაფერს აიტანსო".
"ამ მიკროფონებსაც ბერი რამ აუტანით და ალბათ მომავალშიც აიტანენ. ოპოზიციის მიზანია მხოლოდ ლაპარაკი და ჩვენი საქმე ლაპარაკის ნაცვლად", - დასძინა მაჭავარიანმა.
ამასთან, პარლამენტის თავმჯდომარის პირველმა მოადგილემ აღნიშნა, რომ 2003 წელს საქართველოში მენტალობის პრობლემა არსებობდა.
"ჩვენ უნდა დავრჩენილიყავით "გაიჩნიკების" მენტალობით ან ჩამოგვეყალიბებინა სახელმწიფო მსოფლმხედველობა", - დასძინა მან.
ამასთან, მაჭავარიანმა ოპოზიციას მოუწოდა კრიტიკის და ქილიკის ნაცვლად მათთან ერთად ქვეყნის ასაშენებლად "ხელები დაიკაპიწონ".
