საპარლამენტო ოპოზიცია უმრავლესობასა და მინისტრთა კაბინეტს არადეკვატურობაში ადანაშაულებს. ამის შესახებ დღეს, პარლამენტის რიგგარეშე პლენარულ სხდომაზე სამთავრობო დებატების დროს "ქრისტიან-დემოკრატების" წევრმა, ვიცე-სპიკერმა ლევან ვეფხვაძემ განაცხადა.
"სამწუხარო იყო, როდესაც ძალიან ბერი პრობლემა და თემა დაისვა და ეს მინისტრებისა და უმრავლესობის მხრიდან არადეკვატურად იქნა აღქმული და შეფასებული. ამის ნათელი მაგალითია ის ტერმინოლოგია, რომელიც მთელი გასული კვირის განმავლობაში უმრავლესობის მხრიდან იყო გამოყენებული", - აღნიშნა ვეფხვაძემ.
მისივე შეფასებით, როდესაც არის ობიექტური კრიტიკა, ობიექტური აზრები და შეფასებები, ამაზე უნდა იყოს კონტრარგუმენტები.
"მაგრამ, როდესაც კონტრარგუმენტები არის შეურაცხყოფა, ეს ნიშნავს იმას, რომ მეორე მხარის პოზიცია არის ძალიან სუსტი", - მიმართა ვეფხვაძემ უმრავლესობასა და მთავრობას.