დღეს, 29 მარტს, წინანდალში, საქართველოს ათასწლეულის ფონდის ორგანიზებით, აგრობიზნესის განვითარების პროექტის ფარგლებში კახეთის რეგიონში დაფინანსებული პროდუქციის აგროსასურსათო ექსპო-გამოფენა გაიმართება. ღონისძიებას ფონდის აღმასრულებელი დირექტორი გიორგი აბდუშელიშვილი უმასპინძლებს და მასში მონაწილეობას მიიღებენ საქართველოს სოფლის მეურნეობის მინისტრი ბაკურ კვეზერელი, პრეზიდენტის რწმუნებული კახეთის რეგიონში გიორგი ღვინიაშვილი, ათასწლეულის კორპორაციის ვიცე პრეზიდენტი პატრიკ ფაინი და კორპორაციის დირექტორთა საბჭოს წევრი ალან პატრიკოფი, აგრეთვე, ადგილობრივი ფერმერები და მეწარმეები.
ათასწლეულის ფონდის აგრობიზნესის განვითარების პროექტის ფარგლებში სულ 280 საგრანტო პროექტი დაფინანსდა, რომლებიც საქართველოს ყველა რეგიონში ხორციელდება სოფლის მეურნეობის ისეთ სფეროებში, როგორიცაა მეცხოველეობა, მეფრინველეობა, მეფუტკრეობა, ხილისა და ბოსტნეულის წარმოება-გადამუშავება, საკონსერვო წარმოება და სხვ. და მიზნად ისახავს პირველადი წარმოების, მცირე და საშუალო საწარმოებისა და ფერმერთა მომსახურების ცენტრების განვითარებას მთელი ქვეყნის მასშტაბით. თითქმის 16 მილიონი აშშ დოლარის საგრანტო თანხის მობილიზებით და თანადაფინანსების სახით ამდენივე ინვესტიციის მოზიდვით, ათასწლეულის გამოწვევის პროგრამის ფარგლებში სოფლის მეურნეობაში ჩადებული ინვესტიციის ოდენობამ 32 მილიონ აშშ დოლარს მიაღწია.
დღეისთვის წარმატებულ კომერციულ საქმიანობას ეწევა აგრობიზნესის პროექტის ფარგლებში დაფინანსებული 180-მდე პირველადი პროდუქციის მწარმოებელი, 60-მდე მცირე და საშუალო გადამამუშავებელი საწარმო და ფერმერთა მომსახურების 33 ცენტრი. პროექტების განხორციელების შედეგად სოფლად 3,000-მდე ახალი სამუშაო შეიქმნა, არაპირდაპირი სარგებელი კი ნედლეულის ჩაბარებითა და საცალო რეალიზაციით 100,000-ზე მეტმა ადამიანმა პოვა.