საქართველოში ინდოელი ინვესტორების შემოყვანაზე მთავრობასთან ერთად, ამიერიდან საქართველო-ინდოეთის ბიზნესასოციაციაც იმუშავებს. სასტუმრო "შერატონ მეტეხი პალასში" დღეს, საქართველო-ინდოეთის ბიზნესფორუმი გაიმართა, სადაც ინდოელ ბიზნესმენებს საშუალება ქონდათ ქართული ბიზნესის წარმომადგენლებს ადგილზე შეხვედროდნენ და დეტალური ინფორმაცია მიეღოთ. ეკონომიკისა და მდგრადი განვითარების მინისტრი ამბობს, რომ ინდური ინვესტიცია საქართველოში მზარდია და სამომავლოდ ის კიდევ უფრო გაიზრდება.
"ინდური ინვესტიციებით საქართველოში უკვე დიდი რაოდენობის საწარმოები შეიქმნა. ბოლო რამდენიმე თვის განმავლობაში მთვარობის წევრები ინდოეთში ოფიციალური ვიზიტით ვიმყოფებოდით. ინდოეთი არის ქვეყანა, საიდანაც შეგვიძლია, რომ ბევრი ინვესტორი ჩამოვიყვანოთ. ეკონომიკური ზრდა იქ არის ყველაზე მაღალი"_ აღნიშნა ვერა ქობალიამ.
საინვესტიციო სააგენტოს დირექტორის ქეთი ბოჭორიშვილის თქმით, ინდოელი ბიზნესმენები საქართველოს საინვესტიციო პოტენციალის ათვისებით დაინტერესებულნი არიან.
"ინდოელი ბიზნესმენები საქართველოში ინვესტირებით დაინტერესებულნი არიან, უფრო კონკრეტულად კი სამშენებლო ინდუსტრიით, ფარმაცევტიკით, ტურიზმითა და აგრობიზნესით. საქართველოში საქართველო-ინდოეთის ბიზნეს ასოციაცია ჩამოყალიბდა და ისინი ქვეყანაში სერიოზულ ინვესტიციას ახორციელებენ. ინდოეთისათვის მნიშვნელოვანია იმ ქვეყნის ბიზნეს გარემო, სადაც შედიან და განსაკუთრებულად დიდი ყურადღებას უთმობენ რამდენად ჯანსაღი საინვესტიციო გარემოა რამდენად არის დემოკრატიული და რამდენად არ არის ქვეყანაში კორუფცია"- აღნიშნა საინვესტიციო სააგენტოს დირექტორმა.
ინდოეთის ბიზნეს დელეგაციას ინდოეთის ელჩი საქართველოსა და სომხეთში, აქალმალჰოტრა ხელმძღვანელობს. ფორუმის მიზანია ქართულ და ინდურ კომპანიებს შორის ინფორმაციის გაცვლა და კონტაქტების დამყარება.ინდოეთის მხრიდან წარმოდგენილია 20 კომპანია შემდეგი სექტორებიდან: ფარმაცევტიკა, სოფლის მეურნეობა,ტურიზმი, ჯანდაცვა, მშენებლობა და სხვა. ფორუმის ფარგლებში იმართება ორმხრივი შეხვედრები ქართულ და ინდურ კომპანიებს შორის. 29 მარტს კი დაგეგმილია ინდოეთის დელეგაციის ვიზიტი ქართულ კომპანიებში (სექტორების მიხედვით).