საქართველოს ბიზნესასოციაციას ახალი წევრი ჰყავს. ორგანიზაციაში გაერთიანებულ კომპანიებს ამჯერად მენეჯმენტ კომპანია „დექსუსი" შეუერთდა. „დექსუსის" დირექტორის გიორგი ქანანაშვილის განცხადებით, ქვეყნის ერთ-ერთ უმსხვილეს ბიზნესმენთა გაერთიანებაში გაწევრიანება კომპანიის საქმიანობისთვის კიდევ უფრო ეფექტურს გახდის: „ბიზნეს ასოციაციის წევრობა ხელს შეუწყობს ახალი კონტაქტებისა და თანამშრომლობის დამყარებას, როგორც ადგილობრივ, ისე უცხოურ საქმიან წრეებთან, ახალი ინვესტიციების მოზიდვას, ინვესტორებთან თანამშრომლობას და ასოციაციის დახმარებით სამთავრობო სტრუქტურებთან ეფექტური ურთიერთობის წარმართვას",-აცხადებს ქანანაშვილი.
მენეჯმენტ კომპანია „დექსუსი"2010 წლის აგვისტოში დაარსდა. „დექსუსი", როგორც საუკეთესო და ოპტიმალური გადაწყვეტილების მიმღები მენეჯმენტ კომპანია, ამჟამად მასშტაბური პროექტის განხორციელებაზე მუშაობს. მან 2010 წლის სექტემბერში მართვაში აიღო ქართული დეველოპერული და სამშენებლო დარგის ლიდერი "ცენტრ პოინტი ჯგუფი" და მასთან დაკავშირებული კომპანიათა ჯგუფი. „დექსუსის" მენეჯმენტის მიერ შემუშავდა რეაბილიტაციის 3 წლიანი გეგმა, რაც სრულად მოიცავს "ცენტრ პოინტის" გამოყვანას კრიზისული მდგომარეობიდან და დაზარალებული მოსახლეობისათვის ვალდებულებების შესრულებას. ამჟამად კომპანია ვალდებულებების შესრულებასა და პროექტების განხორციელებაზე მუშაობს.
„დექსუსის" მართვაში შესვლამდე „ცენტრ პოინტის" პროექტებში სამშენებლო სამუშაოები პრაქტიკულად შეჩერებული იყო. „დექსუსმა" 246 მომხმარებელი უკვე დააკმაყოფილა. ერთ წელიწადში კომპანია ამ მაჩვენებლის 3150-მდე გაზრდას გეგმავს, რაც მთლიანი მომხმარებლების 51,5%-ს შეადგენს.
