დღეს, 12:00 საათზე, თბილისის საკრებულოს ქრისტიან-დემოკრატმა წევრმა ადამიანის უფლებების დაცვის კომისიის თავმჯდომარის მადგილემ ზაზა გაბუნიამ ტუბერკულოზთან ბრძოლის მსოფლიო დღესთან დაკავშირებით პრეს-კონფერენცია გამართა.
დეპუტატის განცხადებით, ტუბერკულოზის წინააღმდეგ ბრძოლისა და მისი პრევენციისათვის სახელმწიფო ნამდვილად დგამს გარკვეულ ნაბიჯებს, თუმცა პრობლემად რჩება სასჯელაღსრულებით დაწესებულებებში პატიმართა შორის აღნიშნული დაავადების აღმოსაფხვრელად ეფექტური ჯანდაცვითი პოლიტიკის არ არსებობა. ამასთან დაკავშირებით ზაზა გაბუნიამ 2010 წლის ბოლოს ჩატარებული კვლევის შედეგები წარმოადგინა.
"2010 წლის ბოლოს პატიმართა გარდაცვალების მიზეზების შესასწავლად ჩატარდა სამედიცინო მონიტორინგი საქართველოში მოქმედ თვრამეტივე სასჯელაღსრულებით დაწესებულებაში. შედეგად ირკვევა, რომ პატიმართა შორის სიკვდილიანობის მთავარ მიზეზად კვლავ ტუბერკულოზი რჩება. 2010 წლის პირველ ნახევარში გარდაცვლილთა 60%, ხოლო მეორე ნახევარში 37% გარდაცვალების საფუძვლად აღენიშნება ტუბერკულოზი. ამის მიზეზი კი დაგვიანებული სამედიცინო ჩარევაა", - განაცხადა გაბუნიამ.
ამ მდგომარეობის გამოსწორებისათვის ქრისტიან-დემოკრატები სასჯელ-აღსრულების სამინისტროსაგან მოითხოვენ შემუშავდეს ეფექტური მექანიზმი დაავადების დიაგნოსტიკის, გამოვლენისა და დისპანსერში დროული გადაყვანის მიზნით.
გარდაცვლილთა სასამრთლო სამედიცინო ექსპერტიზის დასკვნები გამოთხოვილი იქნა სსიპ ლევან სამხარაულის სახ. სასამართლო ექსპერტიზის ეროვნული ბიუროდან.
