დევნილებს საცხოვრებელი ფართი საკუთრებაში გადაეცათ. თბილისში, წყალსადენის ქუჩაზე, ყოფილ სასტუმრო „ბახტრიონში" მცხოვრებ აფხაზეთიდან დევნილებს საკუთრების დამადასტურებელი მოწმობა მინისტრმა კობა სუბელიანმა მიუტანა. აღნიშნულ ობიექტში 348 დევნილი ოჯახი, 941 ადამიანი ცხოვრობს. პირველ ეტაპზე საკუთრების მოწმობა 100-მა ოჯახმა მიიღო.
ფართის დაკანონებამდე მოხდა ობიექტის ინდივიდუალური გამრიცხველიანება, შეკეთდა სახურავი და მოწესრიგდა წყალგაყვანილობა. დაწყებულია შენობის გაზიფიცირების სამუშაო.
როგორც მინისტრმა აღნიშნა პროცესი შეუქცევადია და მანამ გაგრძელდება, სანამ თითოეული დევნილი ოჯახი არ დაკმაყოფილდება: „აღნიშნულ ობიექტში 348 დევნილი ოჯახი ცხორობს, როგორც ხედავთ, ფართის დაკანონების პროცესი გრძელდება. წლევანდელი გეგმით, მესაკუთრე 22 ათასზე მეტი ოჯახი უნდა გახდეს. მიმდინარეობს გაზიფიცირების სამუშაო, ელექტროენერგიის ინდივიდუალური გამრიცხველიანება თითქმის დასრულებულია. საკუთრება ყველა იჯახს ექნება. ფართის გაყიდვის შემთხვევაში კი საშემოსავლო გადასახადისგან თავისუფლდებიან და საკუთარ მიწა-წყალზე დაბრუნებამდე ღირსეულად იცხოვრებენ. დაბრუნების შემთხვევაში კი შეეძლებათ ამ ფართის რეალიზაცია მოახდინონ. პროცესი გრძელდება ჩვენ ყოველთვის ამ ხალხის გვერდით ვიქნებით, სანამ თითოეული ოჯახი არ დაკმაყოფილდება. მსგავსი შეხვედრები ყოველდღიურ რეჟიმში გაგრძელდება".
დევნილებმა მინისტრთან საუბრისას აღნიშნეს, რომ ფართის დაკანონებას დიდხანს ელოდნენ. ცირა ბოჭორიშვილი, აფხაზეთიდან დევნილი: „წლებია, ჰაერში გამოკიდებულები ვიყავით. ეს შენობა სადაო იყო და არ ვიცოდით, დაგვტოვებდნენ თუ რა გველოდა. ჩვენდა საბედნიეროდ, დადებითი გადაწყვეტილება მიიღეს, ფართი დაგვიკანონეს და საკუთრების მოწმობა აგერ მინისტრმა მოგვიტანა. მანამდე კი დენის მრიცხველები გაგვიკეთეს და შენობის გაზიფიცირება სრულდება, მაგრამ გასაკეთებელი კიდევ ბევრია. დღეიდან უკვე ვიცით, რომ ეს ფართი ჩვენია და მესაკუთრეები ვართ".
