ხვალ, 17:00 საათზე, "ღია გალერეაში" გაიხსნება უსახლკარო და სოციალურად დაუცველი ბავშვების ნახატების გამოფენა "უკეთესი მომავლისათვის". ნამუშევრები ორგანიზაცია "ბავშვი და გარემო" 32 აღსაზრდელს ეკუთვნის.
გამოფენის მიზანი საზოგადოებაში ბავშვების ინტეგრაციის ხელშეწყობა და ფინანსური სახსრების მოძიებაა, რათა ორგანიზაციამ აბასთუმანის ქუჩაზე მდებარე, თბილისის მერიის მიერ გადაცემული შენობის რეაბილიტაცია შეძლოს. ახალ შენობაში სადღეღამისო ცენტრი იფუნქციონირებს, რაც მათ საშუალებას მისცემს, მეტ ბავშვს გაუწიონ დახმარება.
ორგანიზაცია "ბავშვი და გარემო" უკვე 16 წელია 6-17 წლამდე ქუჩის ბავშვებს ეხმარება და მათ თავშესაფრით, საკვებითა და ტანსაცმლით უზრუნველყოფს. ორგანიზაციის მოხალისეები ბაღებსა და პარკებში, ეკლესიებთან, ბაზრებთან, სადგურების ტერიტორიაზე მიუსაფარ ბავშვებს აგროვებენ.
