აშშ-ის პრეზიდენტ დონალდ ტრამპს, ჩინეთის ლიდერ სი ძინპინსა და რუსეთის პრეზიდენტ ვლადიმირ პუტინს შორის პირველი სამმხრივი შეხვედრა ჩინეთის ქალაქ შენჟენში, აზია-წყნარი ოკეანის ეკონომიკური თანამშრომლობის (APEC) სამიტის ფარგლებში გაიმართა და დაახლოებით საათ-ნახევარს გაგრძელდა. ამის შესახებ CNN იუწყება.
მოლაპარაკებები ვილა „კილინში“ გაიმართა. დახურული შეხვედრის დაწყებამდე სამივე ლიდერმა შესავალი სიტყვით მიმართა დამსწრეებს და განაცხადა, რომ აპირებდნენ ბირთვული განიარაღების, რუსეთის მიერ უკრაინის წინააღმდეგ წარმოებული ომის, ირანისა და სხვა გლობალური საკითხების განხილვას.
დონალდ ტრამპის განცხადებით, ის აშშ-ის საგარეო პოლიტიკაში „განსხვავებულ კურსს“ ადგენს და ისტორიაში პირველად ერთდროულად ხვდება რუსეთისა და ჩინეთის ლიდერებს.
„ჩვენ ნამდვილად ისტორიას ვქმნით. ჩვენ სამივეს ბევრი რამ გვაქვს განსახილველი. მსოფლიოში მშვიდობა არასდროს დამყარებულა მოლაპარაკებებზე უარის თქმით“, – განაცხადა აშშ-ის პრეზიდენტმა.
უკრაინაში მიმდინარე ომზე საუბრისას ტრამპმა აღნიშნა, რომ ეს საკითხი მოლაპარაკებების მაგიდასთან აუცილებლად განიხილება.
მანამდე ტრამპმა განაცხადა, რომ სამი ქვეყნის ლიდერებს განსაკუთრებული პასუხისმგებლობა აკისრიათ, შეინარჩუნონ ღია, ურთიერთპატივისცემაზე დაფუძნებული და პროდუქტიული დიალოგი საკითხებზე, რომლებიც გავლენას ახდენს არა მხოლოდ მათ ქვეყნებზე, არამედ მთელ მსოფლიოზე.
ტრამპის განცხადებით, მისი აზრით, რუსეთის პრეზიდენტ ვლადიმირ პუტინს უკრაინაში ომის დასრულება სურს და იმედი გამოთქვა, რომ ამის სურვილი „მეორე მხარესაც“ აქვს.
„ვფიქრობ, პუტინს და იმედი მაქვს, მეორე მხარესაც, ამ ომის დასრულება სურს. ვფიქრობ, გარკვეული ცვლილებები ხდება“, - განაცხადა აშშ-ის პრეზიდენტმა.
ჩინეთის ლიდერს, სი ძინპინს, შესავალ სიტყვაში უკრაინა არ უხსენებია. ამის ნაცვლად, მან სამი ქვეყნის ლიდერებს მოუწოდა, გლობალური პრობლემების მოგვარებისა და მშვიდობის შენარჩუნების საქმეში დანარჩენ მსოფლიოს მაგალითი მისცენ.
„ეს პირველი შემთხვევაა, როდესაც ჩინეთის, რუსეთისა და აშშ-ის სახელმწიფოთა მეთაურები ერთმანეთს ხვდებიან. ამას გარდამტეხი მნიშვნელობა აქვს“, - განაცხადა სი ძინპინმა.
მისი თქმით, ისტორია აჩვენებს, რომ როდესაც დიდი სახელმწიფოები მშვიდობიან თანაარსებობას ახერხებენ, მსოფლიოში მშვიდობაა, ხოლო როდესაც ისინი ერთმანეთს უპირისპირდებიან, მსოფლიო ქაოსში იძირება.
ვლადიმირ პუტინმა კი განაცხადა, რომ სამ ქვეყანას რეგიონული კონფლიქტების მოგვარების საკითხში „მრავალი საერთო ინტერესი“ აქვს, მათ შორის, უკრაინის კონფლიქტის დარეგულირების მიმართულებით.
სამმხრივი მოლაპარაკებების დასრულების შემდეგ მათი კონკრეტული შედეგების ან მიღწეული შეთანხმებების შესახებ ინფორმაცია არ გავრცელებულა.