ქრისტიან-დემოკრატიული მოძრაობის ლიდერებმა ინგა გრიგოლიამ და ზაზა გაბუნიამ ჯანდაცვის სამინისტროში შეხვედრა გამართეს, სადაც სამინისტროს მესვეურებს იმ მოქალაქეების სია წარუდგინეს, რომელნიც ენერგოვაუჩერების გარეშე დარჩნენ.
შეხვედრაზე ქრისტიან-დემოკრატებმა ენერგოვაუჩერებით ყველა მოქალაქის, მათ შორის სოციალურად დაუცველთა უზრუნველყოფა და 200 კილოვატის პრაქტიკის გაუქმება მოითხოვეს.
"ჩვენ ამ საკითხის მთავრობის მხრიდან ინიცირების დღიდან ვამბობდით, რომ ვაუჩერების მხოლოდ აქტიური გადამხდელისთვის გადაცემა დახმარების მიღმა დატოვებდა მოქალაქეთა იმ ნაწილს, რომელიც უსახსრობის გამო ვერ მოიხმარს 200 კილოვატს. ამასთან მოვითხოვთ, რომ შედგეს დამატებითი სიები და აღნიშნული ვაუჩერები დაურიგდეს სოციალურად დაუცველებსაც", _ განაცხადა გაბუნიამ.
სამინისტროსთან ქრისტიან-დემოკრატებთან ერთად, ის მოქალაქეებიც იმყოფებოდნენ, რომელთაც ენერგოვაუჩერები არ მიუღიათ.