დიდი ბრიტანეთის პრემიერ-მინისტრმა ენდი ბერნემმა განაცხადა, რომ რუსეთი დეზინფორმაციასა და ადამიანების შიშს იარაღად იყენებს. მისივე თქმით, ხელოვნური ინტელექტის განვითარება დეზინფორმაციის იარაღად გამოყენების რისკს კიდევ უფრო გაზრდის.
ამის შესახებ ბერნემმა გაერო-ს გენერალური ასამბლეის 81-ე სესიაზე, თავის პირველ გამოსვლაში განაცხადა. მისი თქმით, ბრიტანეთმა შესაძლოა საერთაშორისო ძალისხმევას უხელმძღვანელოს, რომელიც დეზინფორმაციასთან და უცხოურ ჩარევასთან ბრძოლას ისახავს მიზნად.
ბერნემის განცხადებით, დიდი ბრიტანეთი და მისი მოკავშირეები ბოლო წლებში მტრულად განწყობილი აქტორების მხრიდან ინფორმაციულ სივრცეზე მასშტაბური თავდასხმების სამიზნეები გახდნენ.
„რუსეთის სპეცსამსახურებმა მათ ხელთ არსებული ყველა საშუალება გამოიყენეს სიცრუისა და დეზინფორმაციის გასავრცელებლად, ადამიანების შიშის ექსპლუატაციისთვის ისინი იყენებდნენ ბოტებსა და ყალბ ვებგვერდებს“, - განაცხადა ბერნემმა.
მისი თქმით, მტრული სპეცსამსახურები ასევე აძლიერებდნენ ულტრამემარჯვენე ნარატივებს და ცდილობდნენ 2019 წლის საყოველთაო არჩევნებში ჩარევას.
ბრიტანეთის პრემიერ-მინისტრმა ასევე განაცხადა, რომ ხელოვნური ინტელექტი დეზინფორმაციის გავრცელებას კიდევ უფრო გაამარტივებს და ამ მიმართულებით ახალი ეროვნული ცენტრის შექმნა დააანონსა. ცენტრის მიზანი უცხოური საინფორმაციო თავდასხმების გამოვლენა, მათი წყაროს დადგენა და აღკვეთა იქნება.
როგორც მედია წერს, ბერნემის გამოსვლის ფონზე, ბრიტანეთში მიმდინარეობს გამოძიება 31 წლის ჯოშუა კამიჯის წინააღმდეგ, რომელსაც უცხოურ სადაზვერვო სამსახურთან თანამშრომლობასა და სუინდონში დრონების მწარმოებელ ობიექტებზე დივერსიის მომზადებაში ედება ბრალი. გამოძიების ვერსიით, ის შესაძლოა რუსეთის ინტერესების სასარგებლოდ მოქმედებდა.
ბრიტანეთის პრემიერ-მინისტრის განცხადებებს წინ უძღოდა მოსკოვის მუქარა, რომ უკრაინაში ბრიტანული იარაღის გამოყენების საპასუხოდ შესაძლოა დიდი ბრიტანეთის სამხედრო ობიექტებზე უკრაინის ტერიტორიაზე და მის ფარგლებს გარეთ იერიში მიიტანოს.
ბერნემმა მანამდე განაცხადა, რომ რუსეთის მხრიდან მუქარა ბრიტანეთის უკრაინის მხარდაჭერას ვერ შეაჩერებს.
