17 სექტემბრის ღამეს რუსულმა ძალებმა კიევის რამდენიმე რაიონს დაარტყეს. თავდასხმის შედეგად დაფიქსირდა დარტყმები, დაშავდა 12 ადამიანი. ამის შესახებ ინფორმაციას უკრაინული მედია კიევის მერის, ვიტალი კლიჩკოზე დაყრდნობით ავრცელებს.
მანამდე უკრაინის შეიარაღებული ძალების საჰაერო ძალებმა MiG-31K ტიპის გამანადგურებლის აფრენის, ბალისტიკური იარაღის გამოყენების საფრთხისა და დედაქალაქისკენ მოძრავი რაკეტების შესახებ გაფრთხილება გაავრცელეს.
კლიჩკოს ინფორმაციით, დნიპროვსკის რაიონში ნამსხვრევები რამდენიმე ადგილზე ჩაცვივდა. დაზიანდა საოფისე შენობა და საცხოვრებელი სახლი. ნამსხვრევები ასევე ჩაცვივდა სასაწყობე შენობების ტერიტორიაზე და ბენზინგასამართ სადგურთან.
გარდა ამისა, ერთ-ერთ მონაკვეთზე დაზიანდა სამსართულიანი საოფისე შენობის მინა და ფასადი.
„სვიატოშინის რაიონში, წინასწარი ინფორმაციით, დარტყმა არასაცხოვრებელ შენობაზე განხორციელდა. ასევე, რამდენიმე საცხოვრებელ სახლში ფანჯრები ჩაიმსხვრა. სოლომენსკის რაიონში, წინასწარი ინფორმაციით, საწყობის შენობა დაინგრა. წინასწარი მონაცემებით, ხანძარი არ გაჩენილა“, - ნათქვამია განცხადებაში.
„ამ დროისთვის დედაქალაქში მტრის თავდასხმის შედეგად 12 ადამიანი დაშავდა. დაშავებულებს შორის ორი ბავშვია - 10 და 12 წლის. საავადმყოფოებში 9 დაშავებული იმყოფება“, - განაცხადა კიევის მერმა.
