უკრაინის გენერალურმა პროკურორმა რუსლან კრავჩენკომ უკრაინის ეროვნული ანტიკორუფციული ბიუროს დირექტორ სემიონ კრივონოსს ბრალი წაუყენა და უკრაინის ეროვნულ ანტიკორუფციულ ბიუროსა და სპეციალიზებულ ანტიკორუფციულ პროკურატურას მათი თანამშრომლების წინააღმდეგ მიმდინარე სისხლის სამართლის საქმეების მასალების უკანონოდ დაუფლებაში დასდო ბრალი. იუწყება უკრაინული მედია.
კრავჩენკოს განცხადებით, აღნიშნული მასალების მოპოვების მიზნით ჩხრეკა სპეცოპერაცია „კართაგენის“ ფარგლებში ჩატარდა, რის შემდეგაც ამ საქმეებზე საპროცესო გადაწყვეტილებების მიღების შეჩერება იგეგმებოდა.
„ე.წ. ოპერაცია „კართაგენი“ მხოლოდ ჩემს წინააღმდეგ არ იყო მიმართული. მისი რეალური მიზანი უკრაინის ეროვნული ანტიკორუფციული ბიუროსა და სპეციალიზებული ანტიკორუფციული პროკურატურის ხელმძღვანელებისა და თანამშრომლების წინააღმდეგ მიმდინარე სისხლის სამართლის საქმეების მასალებზე წვდომის მოპოვება იყო. ამის შემდეგ კი გენერალური პროკურორის თანამდებობიდან ჩამოშორება და ამ საქმეებზე საპროცესო გადაწყვეტილებების მიღების შეჩერება...
დღეს გენერალური პროკურატურის ოფისი საპროცესო ხელმძღვანელობას უწევს ათობით სისხლის სამართლის საქმეს, რომლებშიც უკრაინის ეროვნული ანტიკორუფციული ბიუროსა და სპეციალიზებული ანტიკორუფციული პროკურატურის თანამშრომლების მიერ ჩადენილი მძიმე და განსაკუთრებით მძიმე დანაშაულები იძიება... მოპოვებულ მტკიცებულებებზე დაყრდნობით, უკრაინის ეროვნული ანტიკორუფციული ბიუროს დირექტორ სემიონ კრივონოსს ბრალი წავუყენე“, - განაცხადა კრავჩენკომ.
გენერალური პროკურორის თქმით, გენერალური პროკურატურის ოფისის სამუშაო სივრცეებში ჩატარებული ჩხრეკის დროს უკრაინის ეროვნული ანტიკორუფციული ბიუროსა და სპეციალიზებული ანტიკორუფციული პროკურატურის თანამშრომლებმა კანონით დაცულ სისხლის სამართლის საქმეების მასალებზე წვდომა მიიღეს. მისი განცხადებით, დოკუმენტებისა და ელექტრონული მონაცემების ნაწილი დააკოპირეს და მოიპარეს.
კრავჩენკო კრივონოსს ედავება, ოფიციალური დოკუმენტების გაყალბებას, განსაკუთრებით დიდი ოდენობით უკანონო სარგებლის მიღების მიზნით, რომლის მიზანიც მისი თქმით, სასამართლოში პასუხისმგებლობისთვის თავის არიდების საფუძვლის შექმნა იყო.
