შვედეთის საპარლამენტო არჩევნებში მემარცხენე-ცენტრისტული ოპოზიციური ბლოკი, რომელსაც სოციალ-დემოკრატების ლიდერი მაგდალენა ანდერსონი ხელმძღვანელობს, მცირე უპირატესობით ლიდერობს.
ხმების 94%-ზე მეტის დათვლის შემდეგ, მემარცხენე-ცენტრისტულ ბლოკს ხმების 49.3% აქვს, ხოლო პრემიერ-მინისტრ ულფ კრისტერსონის მემარჯვენე-ცენტრისტულ მმართველ ბლოკს - 49.1%. სხვაობა მხოლოდ 0.2 პროცენტული პუნქტია.
შვედეთის საარჩევნო უწყების წინასწარი მონაცემებით, მემარცხენე-ცენტრისტული ბლოკი 349-წევრიან პარლამენტში 175 მანდატს იღებს, მმართველი მემარჯვენე ბლოკი კი - 174-ს.
მნიშვნელოვანი ცვლილება დაფიქსირდა ულტრამემარჯვენე „შვედი დემოკრატების“ შედეგშიც. პარტიას დაახლოებით 17.7% აქვს, რაც 2022 წლის არჩევნებთან შედარებით თითქმის 3 პროცენტული პუნქტით ნაკლებია. შედეგად, პარტია მეორე ადგილიდან მესამე პოზიციაზე გადავიდა.
არჩევნების საბოლოო შედეგები ჯერ დადგენილი არ არის. საზღვარგარეთიდან მიღებული და დაგვიანებული ბიულეტენების დათვლამ შესაძლოა მანდატების განაწილება შეცვალოს. შვედეთის პარლამენტის ინფორმაციით, საბოლოო შედეგი არჩევნებიდან დაახლოებით ერთ კვირაში დადგინდება.
თუ მემარცხენე-ცენტრისტული ბლოკის უპირატესობა საბოლოოდ შენარჩუნდა, მაგდალენა ანდერსონს მთავრობის ფორმირების შესაძლებლობა მიეცემა, თუმცა ბლოკში შემავალ პარტიებს შორის არსებული განსხვავებები კოალიციის შექმნას გაართულებს.
