აშშ-ის პრეზიდენტმა დონალდ ტრამპმა და დიდი ბრიტანეთის პრემიერ-მინისტრმა ენდი ბერნემმა სატელეფონო საუბარი გამართეს, რომლის დროსაც უკრაინაში ომის, ახლო აღმოსავლეთსა და ორ ქვეყანას შორის ეკონომიკურ საკითხებზე ისაუბრეს. ამის შესახებ ინფორმაციას ბრიტანეთის მთავრობის პრესსამსახური ავრცელებს.
უკრაინასთან დაკავშირებით, ლიდერები შეთანხმდნენ, რომ აუცილებელია გაგრძელდეს მუშაობა ცეცხლის შეწყვეტის მისაღწევად, რათა თავიდან იქნას აცილებული ადამიანების ახალი მსხვერპლი.
ბერნემმა კიდევ ერთხელ დაადასტურა დიდი ბრიტანეთის მხარდაჭერა უკრაინისადმი და ბოლო პერიოდში აშშ-ის ხელმძღვანელობით მიმდინარე სამშვიდობო მოლაპარაკებებისადმი.
საუბრისას მხარეებმა ახლო აღმოსავლეთში შექმნილი ვითარებაც განიხილეს. ბერნემმა განაცხადა, რომ დიდი ბრიტანეთი რეგიონში მშვიდობისა და უსაფრთხოების დამყარებისთვის მუშაობას გააგრძელებს.
ბრიტანეთის პრემიერ-მინისტრმა ასევე ხაზი გაუსვა ორი სახელმწიფოს პრინციპზე დაფუძნებული გადაწყვეტის მნიშვნელობას, ჰორმუზის სრუტის გახსნის აუცილებლობას და იმას, რომ ირანმა ბირთვული იარაღი არასოდეს უნდა მიიღოს.
ეკონომიკურ საკითხებზე საუბრისას ბერნემმა ტრამპს აშშ-ის დასაქმების ბოლო მაჩვენებლების გამო მიულოცა, ასევე აღნიშნა ბრიტანეთის ეკონომიკაში ზრდის პოზიტიური ნიშნები.
ლიდერები შეთანხმდნენ, რომ უახლოეს მომავალში კვლავ ისაუბრებენ.
