ისრაელის პრემიერ-მინისტრმა ბენიამინ ნეთანიაჰუმ დონალდ ტრამპისა და მის მიერ შექმნილი მშვიდობის საბჭოს გეგმა ღაზის სექტორთან დაკავშირებით უარყო. მან განაცხადა, რომ ისრაელის თავდაცვის ძალები ღაზის სექტორიდან ჯარებს არ გაიყვანენ, ვიდრე „ჰამასი“ სრულად არ განიარაღდება.
„როდესაც ვამბობ, რომ „ჰამასი“ უნდა განიარაღდეს, ვგულისხმობ მძიმე შეიარაღებას და ყველა სახის იარაღს.ჩვენ ვსაუბრობთ ნამდვილ განიარაღებაზე და არა მოჩვენებითზე“, - განაცხადა ნეთანიაჰუმ მინისტრთა კაბინეტის სხდომის დაწყებისას.
CNN.-ის ცნობით „ჰამასის“ პოლიტბიუროს წევრმა ბასემ ნაიმმა განაცხადა, რომ დაჯგუფება კვლავ ერთგულია ტრამპის მშვიდობის საბჭოს მიერ შემუშავებული სამოქმედო გეგმის. მან აშშ-სა და შუამავლებს ნეთანიაჰუზე ზეწოლისკენ მოუწოდა.
ივლისის ბოლოს აშშ-ის პრეზიდენტმა დონალდ ტრამპმა განაცხადა, რომ მის მიერ შექმნილმა მშვიდობის საბჭომ „ისტორიულ შეთანხმებას“ მიაღწია, რომელიც ღაზის სექტორში „ჰამასისა“ და „ყველა სხვა შეიარაღებული დაჯგუფების“ სრულ განიარაღებას ითვალისწინებს.
ტრამპის შეფასებით, ეს შეთანხმება მნიშვნელოვანი ნაბიჯი იქნება იმისკენ, რომ „ღაზას საბოლოოდ ახალი პალესტინური მთავრობა მართავდეს“, ხოლო ისრაელმა „დაიმსახუროს ის უსაფრთხოება, რომელსაც იმსახურებს, რადგან ღაზა აღარ იქნება ტერორისტული თავდასხმების ბაზა“.
ტრამპის განცხადების შემდეგ „ჰამასის“ წარმომადგენელმა რაზი ჰამადმა განაცხადა, რომ დაჯგუფება მხოლოდ იმ შემთხვევაში განიარაღდება, თუ ისრაელის ჯარები ღაზის სექტორს დატოვებენ.
თავის მხრივ, „ჰამასში“ Reuters-ის წყარომ განაცხადა, რომ „შეთანხმების პროექტი“ ითვალისწინებს მძიმე შეიარაღების შენახვას და მასზე კონტროლის მხოლოდ პალესტინის ადმინისტრაციისთვის გადაცემას. წყაროს თქმით, ეს შეიარაღება ისრაელს ვერ გადაეცემა.
