უკრაინის საგარეო საქმეთა მინისტრმა ანდრი სიბიჰამ, კიევის ოლქზე რუსეთის მორიგი მასშტაბური თავდასხმის ფონზე, საერთაშორისო საზოგადოებას მოუწოდა, რუსეთზე სანქციებით ზეწოლა გააგრძელოს.
„ღამით რუსეთმა კიევსა და ოლქს ორ ათეულზე მეტი ბალისტიკური რაკეტით შეუტია, რის შედეგადაც სულ მცირე 17 ადამიანი დაიღუპა და 40-ზე მეტი დაშავდა. რუსეთის დარტყმებს არდადეგები არ აქვს; ასევე არ უნდა შეწყდეს უკრაინის მხარდაჭერა და აგრესორზე ზეწოლა “, - განაცხადა სიბიჰამ.
მან ხაზი გაუსვა, რომ თითოეულ სარაკეტო ჩამომგდებ სისტემას გადამწყვეტი მნიშვნელობა აქვს.
„ეს არის სიცოცხლის გადამრჩენი ინსტრუმენტები და მოვუწოდებ ყველა პარტნიორს, დააჩქარონ ყველა შესაბამისი გადაწყვეტილების მიღება“, - განაცხადა სიბიგამ.
მისი თქმით, ასევე აუცილებელია რუსეთს ბალისტიკური რაკეტების წარმოების შესაძლებლობა ჩამოერთვას.
„დამატებითი მკაცრი სანქციები კრიტიკულად მნიშვნელოვანია და მათი ამოქმედება გადაუდებელია“, - ხაზი გაუსვა საგარეო საქმეთა მინისტრმა.
„რუსეთის თავდასხმების გამართლება არაფრით შეიძლება, მათ შორის უკრაინის ნებისმიერი ქმედებით. ამავე დროს, უკრაინას აქვს სრული უფლება, თავდაცვის ფარგლებში, გაერო-ს წესდების 51-ე მუხლის შესაბამისად, განახორციელოს დარტყმები რუსეთში არსებულ ლეგიტიმურ სამხედრო სამიზნეებზე“, - განაცხადა სიბიhამ.
