ჟენევის საერთაშორისო დისკუსიების 67-ე რაუნდის შემდეგ ოკუპირებული აფხაზეთის ე.წ. საგარეო საქმეთა მინისტრი, ოლეგ ბარციცი, აცხადებს, რომ ქართული მხარე ძალის გამოუყენებლობის შესახებ შეთანხმების მიღწევისკენ დამატებით პროგრესს შეუძლებელს ხდის.
მისი თქმით, აფხაზური მხარე, ისევე როგორც ოკუპირებული ცხინვალის რეგიონის წარმომადგენლები, მიიჩნევენ, რომ ყველა საკითხი უნდა გადაიჭრას მხოლოდ მშვიდობიანი გზით, თუმცა ამავდროულად ამტკიცებენ, რომ რეგიონში არსებული სტატუს-კვო უნდა იყოს გათვალისწინებული.
„საქართველო შეუძლებელს ხდის ჩვენი მთავარი მიზნის - სამხედრო ძალის გამოუყენებლოს შესახებ შეთანხმების მიღწევას. აფხაზური მხარე არ უშვებს სხვა ალტერნატივას, გარდა ყველა არსებული საკითხის მშვიდობიანი და კონსტრუქციული გზით გადაწყვეტისა. ეს მიდგომა სრულიად გამართლებულია, ეფუძნება ჩვენს ისტორიულ-იურიდიულ საფუძვლებს და არსებულ რეალობებს. სამხრეთ კავკასიის რეგიონში ჩამოყალიბდა გარკვეული სტატუს-კვო და ამას მოვუწოდებთ გაითვალისწინონ ჟენევის დისკუსიების ყველა მონაწილემ“, - განაცხადა ბარციცმა.
ამასთან, მისი მტკიცებით, საქართველოს პოზიცია ეწინააღმდეგება „ისტორიულ-იურიდიულ რეალობას“, რადგან თბილისი კვლავ მიიჩნევს, რომ აფხაზეთი რუსეთის მიერ არის ოკუპირებული, რაც, მისი შეფასებით, ხელს უშლის შეთანხმებას ძალის გამოუყენებლობის შესახებ.
„ჩვენ კი საკითხს სრულიად არგუმენტირებულად ვაყენებთ: აფხაზეთის რესპუბლიკა და სამხრეთ ოსეთის რესპუბლიკა - ეს არის ორი სუვერენული, დამოუკიდებელი სახელმწიფო, რომლებიც საქართველოს მეზობლად მდებარეობენ. ამ რეალობას ყველამ უნდა გაუწიოს ანგარიში. ზუსტად ასეთივე პოზიცია აქვს რუსეთსაც“, - განაცხადა საოკუპაციო რეჟიმის წარმომადგენელმა.
