აშშ-ის სახელმწიფო მდივანმა მარკო რუბიომ განაცხადა, რომ უკრაინასთან დაკავშირებულ სამშვიდობო პროცესში ამ დრომდე „ნაყოფიერი შედეგები“ არ მიღწეულა, თუმცა აღნიშნა, რომ გარემოებების შეცვლის შემთხვევაში ვაშინგტონი კვლავ მზად არის უკრაინასა და რუსეთს შორის შუამავლის როლი შეასრულოს.
ამის შესახებ The Guardian წერს.
„ჩვენ კვლავ მზად ვართ ამ როლის შესასრულებლად, თუ ეს კონსტრუქციული იქნება. არ გვინდა დროისა და ძალისხმევის ხარჯვა ისეთ მცდელობებზე, რომლებიც პროგრესს არ იძლევა. მაგრამ თუ დავინახავთ შესაძლებლობას, რომ შუამავლობამ, შესაძლოა, ორივე მხარე სამშვიდობო შეთანხმებამდე მიაახლოოს, ამას აუცილებლად გავაკეთებთ“, - განაცხადა აშშ-ის სახელმწიფო მდივანმა.
მისივე თქმით, შეერთებული შტატები გაჭიანურებულ ომს ტრაგედიად მიიჩნევს, რომლის ფასსაც „ორივე მხარე ძალიან ძვირად იხდის, როგორც ეკონომიკურად, ისე ადამიანური დანაკარგების თვალსაზრისით“.
„ჩვენ მზად ვართ ნებისმიერი როლი შევასრულოთ მშვიდობიანი დიპლომატიური გადაწყვეტის მისაღწევად. სამწუხაროდ, ეს ძალისხმევა ამ ეტაპზე ჩიხში შევიდა, თუმცა თუ გარემოებები შეიცვლება, ჩვენ ყოველთვის მზად ვიქნებით“, - აღნიშნა მარკო რუბიომ.
