რუმინეთში, უკრაინის საზღვართან ახლოს, კიდევ ერთი დრონის ნამსხვრევები აღმოაჩინეს მას შემდეგ, რაც ქალაქ გალაცის რაიონში სხვა უპილოტო საფრენი აპარტის ნაწილები იპოვეს. ამის შემდეგ ქვეყნის საგარეო საქმეთა სამინისტრომ რუსეთის ელჩი დაიბარა. ინფორმაციას რუმინეთის საგარეო უწყება ავრცელებს.
რუმინეთის თავდაცვის სამინისტროს განცხადებით, შაბათს, 25 აპრილს, ინფორმაცია მიიღეს, რომ ტულჩას ოლქში, სოფელ ვეკერენის მახლობლად მდებარე ფერმის ტერიტორიაზე დრონის ნამსხვრევები აღმოაჩინეს.
ტერიტორია სასაზღვრო პოლიციამ შემოღობა, ხოლო ადგილზე გაემგზავრა ერთობლივი ჯგუფი, რომელშიც შედიან თავდაცვის სამინისტროსა და დაზვერვის სამსახურის სპეციალისტები, რათა შეისწავლონ შემთხვევა და შეაგროვონ ნამსხვრევები ექსპერტიზისთვის.
ამავდროულად, რუმინეთის საგარეო საქმეთა სამინისტრომ რუსეთის ელჩი დაიბარა გალაცის რაიონში დრონის ჩამოვარდნის ინციდენტის გამო.
საგარეო უწყების განცხადებით, გალაცის მახლობლად ჩამოვარდა რუსული უპილოტო საფრენი აპარატი, რომელიც გამოიყენებოდა უკრაინის სამოქალაქო ინფრასტრუქტურაზე შეტევებისთვის.
რუმინეთის თავდაცვის სამინისტრომ მანამდე განაცხადა, რომ 25 აპრილს, დილით ქალაქ გალაცის საცხოვრებელ რაიონში უპილოტო საფრენი აპარატის ნამსხვრევები აღმოაჩინეს, რამაც ქონების დაზიანება გამოიწვია. მოგვიანებით, დრონის დარჩენილი ნაწილები გააუვნებელყვეს თავდაცვის სამინისტროს, შინაგან საქმეთა სამინისტროსა და რუმინეთის დაზვერვის სამსახურის სპეციალისტებმა.
რუმინეთის საგანგებო სიტუაციების სამსახურის ცნობით, გალაცში აღმოჩენილ დრონთან ახლოს მყოფი მოსახლეობა უსაფრთხოების მიზნით დროებით ევაკუირებული იქნა .
რუმინეთის პრეზიდენტმა ნიკუშორ დანიმ განაცხადა, რომ ეს პირველი შემთხვევაა, როდესაც რუსეთის დრონმა რუმინეთის ტერიტორიაზე ქონება დააზიანა.
დრონების ნამსხვრევები აღმოჩნდა მას შემდეგ, რაც 25 აპრილის ღამეს რუსეთმა უკრაინაზე კიდევ ერთი მასშტაბური საჰაერო შეტევა განახორციელა, მათ შორის რუმინეთ-უკრაინის საზღვრის სიახლოვეს.
