ვენეციის ბიენალეზე რუსული პავილონის გახსნის გამო, ევროკავშირმა გამოფენას ორმილიონიანი გრანტი შეუჩერა.
ევროპის განათლებისა და კულტურის საკითხთა აღმასრულებელმა სააგენტომ წერილი გაუგზავნა ვენეციის ბიენალეს ფონდს, რომლითაც აცნობა, რომ ევროკავშირის მიერ გამოყოფილ ორი მილიონი ევროს ოდენობის სამწლიან გრანტს აჩერებს.
ამის შესახებ ევროკომისიის წარმომადგენელმა, ტომა რენიემ განაცხადა.
„შემიძლია დავადასტურო, რომ ევროკომისიამ იტალიის მთავრობასა და ბიენალეს ორგანიზატორებს გაუგზავნა წერილები 2 მილიონი ევროს გრანტის შეწყვეტის გადაწყვეტილების შესახებ. ჩვენ პოლიტიკურად ვგმობთ რუსული პავილიონის გახსნის გადაწყვეტილებას და მოვუწოდებთ იტალიის მთავრობას, ამ საკითხს ყურადღება მიაქციოს,“ - განაცხადა ტომა რენიემ.
მანამდე ევროკავშირის უმაღლესმა წარმომადგენელმა საგარეო საქმეთა და უსაფრთხოების პოლიტიკის საკითხებში კაია კალასმა განაცხადა, რომ ევროკავშირი გამოფენაზე რუსეთის დაბრუნების გამო ვენეციის ბიენალეს დაფინანსებას შეამცირებს.
„ვიდრე რუსეთი ბომბავს მუზეუმებს, ანგრევს ეკლესიებს და ცდილობს უკრაინული კულტურის წაშლას, მას არ უნდა მიეცეს საკუთარი კულტურის გამოფენის შესაძლებლობა. რუსეთის დაბრუნება ვენეციის ბიენალეზე მორალურად არასწორია და ევროკავშირი მის დაფინანსებას შეამცირებს,“ - განაცხადა კალასმა ევროკავშირის საგარეო საქმეთა მინისტრების შეხვედრის შემდეგ
