მოლდოვა დამოუკიდებელ სახელმწიფოთა თანამეგობრობას (დსთ) ოფიციალურად 2027 წლის 8 აპრილს დატოვებს.
ამის შესახებ მოლდოვის საგარეო საქმეთა მინისტრმა მიხაი პოპშოიმ განაცხადა.
მინისტრის თქმით, ორგანიზაციიდან გასვლის იურიდიული პროცედურა უკვე დაწყებულია.
„შესაბამისი შეთანხმებების დენონსაციის ხელმოწერისა და მათი ოფიციალურ ბიულეტენში გამოქვეყნების შემდეგ, 8 აპრილს შეტყობინება გაიგზავნა დსთ-ის სამდივნოში მინსკში და ჩვენ მივიღეთ დადასტურება, რომ ჩვენი შეტყობინება მიღებულია“, — აღნიშნა პოპშოიმ.
მისი განმარტებით, საერთაშორისო სამართლის მიხედვით, მოლდოვა დსთ-ს წევრი ოფიციალურად აღარ იქნება შეტყობინების გაგზავნიდან ერთი წლის შემდეგ.
„მომავალი წლის 8 აპრილს, იურიდიული და ფორმალური თვალსაზრისით, ჩვენ უკვე აღარ ვიქნებით დსთ-ის წევრი“, — განაცხადა მოლდოვის საგარეო საქმეთა მინისტრმა.
ამასთან, მიხაი პოპშოიმ აღნიშნა, რომ კიშინიოვსა და დამოუკიდებელ სახელმწიფოთა თანამეგობრობას შორის ურთიერთობა უკვე რამდენიმე წელია ფაქტობრივად აღარ არსებობს.
„პრაქტიკული თვალსაზრისით, ჩვენ უკვე დიდი ხანია აღარ ვართ მისი წევრები, უფრო სწორად, უკვე მრავალი წელია არ ვმონაწილეობთ პოლიტიკურ ღონისძიებებსა და სხვა შეხვედრებში, რომლებიც მოლდოვის რესპუბლიკოს ეროვნულ ინტერესებს არ შეესაბამება“, — განაცხადა პოპშოიმ.
შეგახსენებთ, რომ 9 აპრილს მაია სანდუმ ხელი მოაწერა ბრძანებულებებს, რომლებიც ითვალისწინებს დსთ-ს ფუნდამენტური შეთანხმებების დენონსაციას.
