რომის პაპმა ლეო XIV-მ განაცხადა, რომ არ ეშინია დონალდ ტრამპის კრიტიკის ირანში ომის საკითხთან დაკავშირებით და გააგრძელებს იმ გზავნილების გავრცელებას, რომლებიც საჭიროდ მიაჩნია.
ეს განცხადება მას შემდეგ გაკეთდა , რაც აშშ-ის პრეზიდენტმა პაპი მკაცრად გააკრიტიკა მისი პოზიციის გამო ირანთან დაკავშირებულ კონფლიქტზე. ამის შესახებ CNN იუწყება.
„მე დებატებში არ შევალ. ის, რასაც ვამბობ, არ არის გათვლილი ვინმეზე თავდასხმისთვის. ყველას მოვუწოდებ, ეძებონ გზები მშვიდობისა და შერიგების ხიდების ასაშენებლად და მოძებნონ გზები, როგორ ავირიდოთ ომი ყოველთვის, როცა ეს შესაძლებელია.
მე არ მეშინია დონალდ ტრამპის ადმინისტრაციის და არ მეშინია ხმამაღლა ვთქვა სახარების გზავნილები - სწორედ ამისთვის ვარ აქ და სწორედ ამისთვის არსებობს ეკლესია.
ჩვენ პოლიტიკოსები არ ვართ და საგარეო პოლიტიკას არ ვატარებთ იმავე პერსპექტივით, როგორც ამას, შესაძლოა, ის ხედავს", - განაცხადა პაპმა.
შეგახსენებთ, აშშ-ის პრეზიდენტმა დონალდ ტრამპმა განაცხადა: „ჩვენ არ მოგვწონს პაპი, რომელიც ამბობს, რომ ბირთვული იარაღის ფლობა ნორმალურია… ეს არის ადამიანი, რომელიც ფიქრობს, რომ არ ღირს თამაში ისეთ ქვეყანასთან, რომელიც ცდილობს ბირთვული იარაღის მიღებას, რათა მსოფლიო გაანადგუროს… მე არ ვარ პაპ ლეოს მხარდამჭერი....
პაპი ლეო სუსტია დანაშაულთან ბრძოლაში და საშინელია საგარეო პოლიტიკაში“, - დაწერა ტრამპმა. მან ასევე დაამატა, რომ არ სურს პაპი, რომელიც ნორმალურად მიიჩნევს, რომ ირანს შეიძლება ჰქონდეს ბირთვული იარაღი, ან რომელიც „საშინლად“ აფასებს იმას, რომ ამერიკამ ვენესუელას დაარტყა.
„და მე არ მინდა პაპი, რომელიც აკრიტიკებს ამერიკის შეერთებული შტატების პრეზიდენტს“, - დაამატა მან.
როგორც გამოცემა Politico წერს, რომის პაპმა ლეო XIV განაცხადა, რომ აშშ-ისა და ისრაელის ომს ირანის წინააღმდეგ „ყოვლისშემძლეობის ილუზია“ ამოძრავებს და პოლიტიკურ ლიდერებს დაუყოვნებლივ საბრძოლო მოქმედებების შეწყვეტისკენ მოუწოდა.
„საკმარისია საკუთარი თავისა და ფულის კერპად ქცევა! საკმარისია ძალის დემონსტრირება! საკმარისია ომი!" - განაცხადა პაპმა.
