11 აპრილის ღამეს, რუსულმა საოკუპაციო ძალებმა ოდესაზე იერიში მიიტანეს.
საცხოვრებელ სექტორზე შეტევის შედეგად, დაიღუპა ორი ადამიანი, არიან დაშავებულებიც. ასევე დაზიანდა ათობით სახლი, სტუდენტური საერთო საცხოვრებელი და საბავშვო ბაღი. ინფორმაციას ოდესის სამხედრო ადმინისტრაციის ხელმძღვანელი სერჰიი ლისაკი ავრცელებს.
„მტრის მორიგმა თავდასხმამ ოდესას ტრაგიკული შედეგები მოუტანა. საცხოვრებელ სექტორზე დარტყმის შედეგად ორი ადამიანი დაიღუპა. ვუცხადებ გულწრფელ სამძიმარს ახლობლებს. ამჟამად კიდევ ორი დაშავებული საავადმყოფოში იმყოფება, სადაც მათ ყველა საჭირო დახმარება უტარდებათ,“ - განაცხადა ლისაკმა.
მისივე ცნობით, მნიშვნელოვნად დაზიანდა სამოქალაქო ინფრასტრუქტურა: ათობით კერძო და მრავალბინიანი სახლი, საერთო საცხოვრებელი და ასევე საბავშვო ბაღის შენობა.
სახლებში ჩამსხვრეულია ფანჯრები, დაზიანებულია სახურავები და ფასადები. გარდა ამისა, დაზიანდა საზოგადოებრივი კვების ობიექტებიც.
