უკრაინის საგარეო საქმეთა მინისტრმა ანდრიი სიბიჰამ განაცხადა, რომ კიდევ სამმა ქვეყანამ დაადასტურა მზადყოფნა შეუერთდნენ გაფართოებულ ნაწილობრივ შეთანხმებას, რომელიც უკრაინის წინააღმდეგ რუსეთის აგრესიის დანაშაულის გამოსაძიებლად სპეციალური ტრიბუნალის შექმნას ისახავს მიზნად. სიბიჰას თქმით, ეს ქვეყნებია გაერთიანებული სამეფო, გერმანია და მოლდოვა.
მისი თქმით, საერთო ჯამში, ევროპის საბჭოს 13 წევრი სახელმწიფო და ერთი არაწევრი ქვეყანა უკვე მზადაა შეთანხმებას შეუერთდეს.
„ჩვენ გაცილებით ფართო სპექტრის მონაწილეების შესახებ ვვარაუდობთ. 16 უბრალოდ კანონით დადგენილი მინიმუმია. მოვუწოდებ ყველა კოლეგას, აქტიურად იმუშაონ სახელმწიფოების სიის გაფართოებაზე. იმედი მაქვს, რომ უახლოეს დღეებში დამატებითი განცხადებები გაკეთდება. ჩვენ აქტიურად ვმუშაობთ ამაზე“, - ხაზი გაუსვა სიბიჰამ.
უკრაინის პრეზიდენტის ადმინისტრაციის უფროსის მოადგილემ, ირინა მუდრამ, „უკრინფორმთან“ კომენტარში დაასახელა იმ ქვეყნების სრული სია, რომლებმაც საჯაროდ დაადასტურეს სპეციალური ტრიბუნალის შესახებ შეთანხმებასთან შეერთების განზრახვა.
მათ შორისაა: დიდი ბრიტანეთი, ესტონეთი, ესპანეთი, კოსტა-რიკა, ლატვია, ლიეტუვა, ლუქსემბურგი, მოლდოვა, ნიდერლანდები, გერმანია, სლოვენია, უკრაინა, ხორვატია და შვედეთი.
