საფრანგეთის პრეზიდენტი ემანუელ მაკრონი ეხმიანება იერუსალიმში განვითარებულ მოვლენებს, რომლის შედეგადაც ისრაელის პოლიციამ ლათინ პატრიარქს აღდგომის ტაძარში ბზობის წირვაზე დასწრება შეუზღუდა.
სრულ მხარდაჭერას ვუცხადებ იერუსალიმის ლათია პატრიარქს და წმინდა მიწაზე მცხოვრებ ქრისტიანებს, რომლებსაც ხელი შეუშალეს ბზობის კვირა დღეს წირვის ჩატარებაში.
ვგმობ ისრაელის პოლიციის მიერ მიღებულ ამ გადაწყვეტილებას. წმინდა ადგილებზე რელიგიური რიტუალების აღსრულების უფლება სულ უფრო იზღუდება და ეს შემაშფოთებელია. იერუსალიმში რელიგიური რიტუალების თავისუფლად აღსრულება ყველა რელიგიისთვის უნდა იყოს უზრუნველყოფილი", - წერს მაკრონი.
მანამდე გავრცელდა ინფორმაცია, რომ ისრაელის პოლიციის თანამშრომლებმა იერუსალიმის ლათინ პატრიარქს, კარდინალ პიერბატისტა პიცაბალას და წმინდა მიწის მცველს, მამა ფრანჩესკო იელპოს იერუსალიმში, აღდგომის ტაძარში ბზობის წირვის აღსანიშნავად შესვლაში ხელი შეუშალეს.
სამართალდამცავი ორგანოების წარმომადგენლებმა განაცხადეს, რომ იერუსალიმის ძველ ქალაქში ყველა წმინდა ადგილი, მათ შორის ქრისტიანების, მუსლიმებისა და ებრაელებისთვის წმინდა ადგილები, ირანის წინააღმდეგ აშშ-ისრაელის ოპერაციის დაწყების შემდეგ დაკეტილია მლოცველებისთვის, განსაკუთრებით კი ის ადგილები, სადაც თავშესაფრები არ არის. მათ ასევე თქვეს, რომ უარყვეს საპატრიარქოს მოთხოვნა წირვის ჩატარების შესახებ.
ისრაელის მთავრობის განცხადების თანახმად, ბოლო რამდენიმე დღის განმავლობაში ირანმა ბალისტიკური რაკეტებით არაერთხელ მიიტანა იერიში იერუსალიმში სამივე მონოთეისტური რელიგიის წმინდა ადგილების წინააღმდეგ და ერთ-ერთი დარტყმის დროს, რაკეტის ფრაგმენტები აღდგომის ტაძრიდან რამდენიმე მეტრში ჩამოვარდა. ისრაელის მთავრობის განცხადებით, უსაფრთხოებიდან გამომდინარე, ისრაელმა დროებით სთხოვა ყველა სარწმუნოების წარმომადგენელ მრევლს, არ შეასრულონ მსახურება იერუსალიმის ძველი ქალაქის წმინდა ადგილებში.
კრიტიკული შეფასებების შემდეგ, ისრაელის მთავრობამ განაცხადა, რომ მუშავდება გეგმა, რომელიც ეკლესიის ლიდერებს აღდგომის ტაძარში ლოცვის უფლებას მისცემს.
