უკრაინის პრეზიდენტმა ვოლოდიმირ ზელენსკიმ განაცხადა, რომ ამ დროისთვის ამერიკელ პარტნიორებს არ გაუვრცელებიათ ინფორმაცია უკრაინისთვის განკუთვნილი იარაღის ახლო აღმოსავლეთში მიმდინარე ომისთვის გადამისამართების შესახებ.
ამის შესახებ ზელენსკიმ კატარში ჟურნალისტებთან Zoom-კონფერენციის დროს განაცხადა.
„რაც შეეხება იარაღის გადამისამართებას, მსგავსი არაფერი მომხდარა. ვერ გეტყვით, რა მოხდება შემდეგ. ვფიქრობ, ეს ბევრ ფაქტორზეა დამოკიდებული. კერძოდ, ვფიქრობ, რომ ამ საკითხში გადამწყვეტი ფაქტორი ომის ხანგრძლივობა იქნება. იმედი მაქვს, რომ შესაბამისი ნაბიჯები არ იქნება გადადგმული“, - განაცხადა ზელენსკიმ.
ზელენსკიმ აღნიშნა, რომ უკრაინული მხარე აცნობიერებს იარაღის მოცულობას, რომელსაც შეერთებული შტატები იყენებს ირანთან კონფლიქტში და ასევე იცის, რა აქვს ირანს და რა სჭირდება ქვეყანას რუსეთისგან.
„ეს ყველაფერი გავლენას ახდენს როგორც უკრაინაში, ასევე ახლო აღმოსავლეთში მოვლენების შემდგომ განვითარებაზე. ვიმედოვნებთ, რომ პაკეტები არ გადაიგზავნება. არანაირი სიგნალი არ ყოფილა“, - თქვა ზელენსკიმ.
