უკრაინის პრეზიდენტმა ვოლოდიმირ ზელენსკიმ განაცხადა, რომ უკრაინაზე რუსული დრონების მასშტაბური თავდასხმა, როგორც ღამით, ასევე დღის განმავლობაში, აჩვენებს, რომ რუსეთს არ აქვს ომის დასრულების განზრახვა.
მისი თქმით, აუცილებელია ზეწოლის გაძლიერება.
„დღეს, პრაქტიკულად მთელი დღე-ღამის განმავლობაში, რუსეთი უკრაინას „შაჰედებით“ ურტყამდა. ღამით მასშტაბური თავდასხმა მოხდა: როგორც რაკეტებით, ასევე „შაჰედებით“. მთელი დღის განმავლობაში დრონების ახალი ტალღები. მხოლოდ ერთ დღეში 550-ზე მეტი სხვადასხვა ტიპის დრონი, რომელთა მნიშვნელოვანი რაოდენობა „შაჰედები“ იყო.
მისი თქმით, ამ დარტყმის გეოგრაფია ძალიან ფართოა და მიუხედავად იმისა, რომ დრონების უმეტესობა ჩამოაგდეს, სამწუხაროდ, მაინც დაფიქსირდა დარტყმები - ლვოვში, ფრანკოვსკში, ტერნოპილში, ვინიცაში, ჟიტომირში, ასევე ხმელნიცკის ოლქში, როვნოს ოლქში, ხარკოვის ოლქსა და დნიპროს ოლქში. სამწუხაროდ, არიან დაღუპულები. ვუსამძიმრებ ოჯახებსა და მეგობრებს.
ამ დროისთვის ცნობილია, რომ დაშავებულია 40-ზე მეტი ადამიანი, მათ შორის ხუთი ბავშვი. ყველა იღებს საჭირო დახმარებას“, - განაცხადა უკრაინის პრეზიდენტმა.
ზელენსკიმ აღნიშნა, რომ ენერგეტიკა რუსების მთავარი მიზანია; ისინი აგრძელებენ ოპერაციას უკრაინისა და ჩვენი ენერგეტიკული სისტემის ჩაშლის მიზნით. ასევე ხდება დარტყმები ჩვეულებრივ სახლებზეც - თავს დაესხნენ ქალაქების ცენტრებს, ლვოვის ისტორიულ ცენტრს. ლვოვში, წმინდა ანდრიას ეკლესიის შენობებში ხანძარი გაჩნდა.
„ამ ეკლესიის ისტორია მე-17 საუკუნის დასაწყისიდან იწყება. რუსეთის მიერ მოდერნიზებული ირანული „შაჰედები“, ლვოვის ეკლესიას ესხმიან თავს - ეს აბსოლუტური გარყვნილებაა და ეს მხოლოდ პუტინის მსგავს ადამიანებს შეიძლება მოეწონოთ. ფრანკოვსკში სამშობიარო სახლი დაზიანდა“, - განაცხადა ზელენსკიმ.
„ამ თავდასხმის მასშტაბები ნათლად აჩვენებს, რომ რუსეთს არ აქვს ამ ომის დასრულების განზრახვა. და თუ გავითვალისწინებთ, რომ რუსეთი ასევე ეხმარება ირანის რეჟიმს რეგიონში თავდასხმების განხორციელებაში, დასკვნა საკმაოდ აშკარაა: რუსეთზე დამატებითი და ძლიერი ზეწოლის გარეშე, რუსეთის მნიშვნელოვანი დანაკარგების გარეშე, მოსკოვში არ ექნებათ სურვილი, დაასრულონ ომი და როგორმე შეეგუონ მშვიდობას“, - აღნიშნა ზელენსკიმ.
24 მარტის შუადღისას, რუსეთმა 556 თავდასხმის დრონით უკრაინაზე შეტევა განახორციელა. უკრაინის საჰაერო თავდაცვის სისტემებმა საღამოს 6 საათის მონაცემებით 541 დრონი გაანეიტრალა. სულ, 24 საათში მტერმა უკრაინის წინააღმდეგ 948 უპილოტო საფრენი აპარატი გაუშვა.
