უკრაინის პრეზიდენტმა ვოლოდიმირ ზელენსკიმ განაცხადა, რომ თავდაცვის ძალებმა ჩაშალეს რუსეთის ფართომასშტაბიანი შეტევა, რომელიც ამ გაზაფხულზე იგეგმებოდა.
„რუსეთმა მოამზადა მასშტაბური შეტევითი ოპერაცია, რომლის დაწყებაც გასული წლის ბოლოს და გაგრძელება ამ გაზაფხულზე სურდათ. საპასუხოდ, კონტრშეტევა ჩვენ განვახორციელეთ, რათა თავიდან აგვეცილებინა ფართომასშტაბიანი რუსული შეტევა,“ - განაცხადა ზელენსკიმ.
პრეზიდენტის თქმით, ეს ყველაფერი დიდწილად უკრაინული დრონების ტექნოლოგიის წყალობით გახდა შესაძლებელი. რუსეთმა FPV-სა და სხვა ტიპის დრონების გამო ყოველთვიურად 30 000-35 000 ჯარისკაცს კარგავს.
ზელენსკიმ ასევე განაცხადა, რომ რუსეთის პრეზიდენტ ვლადიმირ პუტინს არასდროს სურდა უკრაინის წინააღმდეგ ომის შეჩერება.
„მას ეშინოდა პრეზიდენტ ტრამპის და შეერთებული შტატების მხრიდან ზეწოლის. სწორედ ამიტომ ტამაშობდა, თითქოს მოლაპარაკებები სურდა. მე კვლავ მჯერა, რომ ამერიკამ პუტინზე ზეწოლა უნდა გააძლიეროს. წინააღმდეგ შემთხვევაში, ის არ დაიწყებს კეთილსინდისიერ მოლაპარაკებას. მას მხოლოდ უკრაინისთვის ულტიმატუმების წაყენება სურს, მაგალითად, ჩვენი ჯარების ჩვენი ტერიტორიიდან გაყვანის მოთხოვნა. თუმცა, ეს მის მადას ვერ დააკმაყოფილებს“, - თქვა მან.
ზელენსკიმ ხაზგასმით აღნიშნა, რომ ირანის გარშემო შექმნილი სიტუაცია რუსეთს მეტ ფულს მოუტანს.
„ჩვენი დაზვერვის ცნობით, შეერთებული შტატებისა და ევროკავშირის მიერ დაწესებული ყველა სანქციის, ასევე რუსეთის ენერგეტიკულ ინფრასტრუქტურაზე ჩვენი გრძელვადიანი დარტყმების გამო, მხოლოდ 2026 წელს რუსეთი 100 მილიარდ დოლარზე მეტი დეფიციტის წინაშე დგას. ახლა ჩვენ ვხედავთ, რომ მათ ახლო აღმოსავლეთში ომის მხოლოდ ორ კვირაში დაახლოებით 10 მილიარდი გამოიმუშავეს. ეს ნამდვილად საშიშია. ეს პუტინს უფრო მეტ დამაჯერებლობას აძლევს, რომ მას შეუძლია ომის გაგრძელება,“ - განაცხადა ზელენსკიმ.
