ავსტრალიამ ირანის ქალთა ეროვნული საფეხბურთო ნაკრების 5 ფეხბურთელს თავშესაფარი მიანიჭა
ამის შესახებ ავსტრალიის შინაგან საქმეთა მინისტრმა, ტონი ბურკმა გამოაცხადა.
„მიუხედავად იმისა, რომ შეთავაზება ნაკრების სხვა წევრებისთვისაც ძალაშია, სავარაუდოდ, ამ შესაძლებლობას ყველა მათგანი არ გამოიყენებს“, - განაცხადა ავსტრალიის შინაგან საქმეთა მინისტრმა.
ეროვნული ჰიმნის შესრულებაზე უარის შემდეგ, ერთ-ერთმა ირანელმა მაღალჩინოსანმა საფეხბურთო ნაკრებს „ომის დროს მოღალატეები“ უწოდა და ხელისულფებას მკაცრი სასჯელისკენ მოუწოდა.
ავსტრალიის მიგრაციის მინისტრმა, ტონი ბურკმა განაცხადა, რომ ქალები ავსტრალიის პოლიციამ „უსაფრთხო ადგილას გადაიყვანა“. მისი თქმით, ქვეყანაში დარჩენა გუნდის სხვა წევრებსაც შეუძლიათ.
ავსტრალიის პრემიერ-მინისტრმა, ენტონი ალბანეზემ ირანის ქალთა ეროვნული საფეხბურთო ნაკრების ხუთი ფეხბურთელისთვის ჰუმანიტარული ვიზების მინიჭების შემდეგ განაცხადა, რომ „ისინი ავსტრალიაში უსაფრთხოდ არიან“.
ავსტრალია აზიის თასს მასპინძლობს. ტურნირი მაშინ დაიწყო, როდესაც აშშ-მა და ისრაელმა ირანის წინააღმდეგ შეტევა დაიწყეს. ირანის ქალთა ეროვნული საფეხბურთო ნაკრების ფეხბურთელებმა ტურნირის პირველი მატჩისას ჰიმნი არ შეასრულეს. ირანის ეროვნული ნაკრები ტურნირს კვირას გამოეთიშა.
ცნობისათვის,აშშ-ის პრეზიდენტმა დონალდ ტრამპმა გუშინ ავსტრალიას მოუწოდა, ირანის ქალთა საფეხბურთო გუნდისთვის თავშესაფარი მიეცათ.
„ავსტრალია საშინელ ჰუმანიტარულ შეცდომას უშვებს ირანის ქალთა ეროვნული საფეხბურთო ნაკრების ირანში იძულებით დაბრუნებით, სადაც მათ, დიდი ალბათობით, მოკლავენ. ნუ გააკეთებთ ამას, ბატონო პრემიერ-მინისტრო, მიეცით მათ თავშესაფარი. თუ ამას არ გააკეთებთ, შეერთებული შტატები მიიღებს მათ. “, - წერს ტრამპი Truth Social-ზე.
