სლოვაკეთი 23 თებერვლიდან უკრაინისთვის ელექტროენერგიის მიწოდებას აჩერებს.
ამის შესახებ სლოვაკეთის პრემიერ-მინისტრმა რობერტ ფიცომ განაცხადა.
„შევასრულე ის, რაც შაბათს გამოვაცხადე, რომ თუ ორშაბათამდე ნავთობის მიწოდება არ განახლდებოდა, სახელმწიფო კომპანია SEPS-ს (სლოვაკეთის ელექტროქსელის სისტემის ოპერატორი) ვთხოვდი, უკრაინისთვის ელექტროენერგიის საგანგებო რეჟიმში მიწოდება შეეჩერებინა. დღეიდან ამოქმედდა წესი: თუ უკრაინული მხარე სლოვაკეთს დახმარებისთვის მიმართავს უკრაინის ელექტროქსელის სტაბილიზაციაში, ის ასეთ დახმარებას ვერ მიიღებს. ეს არის პირველი საპასუხო ნაბიჯი, რომლის გადადგმის უფლებაც სლოვაკეთის მთავრობას აქვს საერთაშორისო წესებისა და ვალდებულებების დარღვევის გარეშე. თუ უკრაინული მხარე კვლავაც ზიანს მიაყენებს სლოვაკეთის ინტერესებს სტრატეგიული ნედლეულის მომარაგების სფეროში, სლოვაკეთის მთავრობა ასევე გადახედავს თავის წინა კონსტრუქციულ პოზიციებს უკრაინის ევროკავშირში გაწევრიანებასთან დაკავშირებით და მოამზადებს შემდგომ ზომებს“, - განაცხადა მან Facebook-ზე.
ცნობისთვის, სლოვაკეთსა და უნგრეთს ნავთობი უკრაინის გავლით „დრუჟბას“ ნავთობსადენით 27 იანვრის შემდეგ აღარ მიეწოდებათ. უკრაინის განცხადებით, ამის მიზეზი ნავთობსადენზე რუსეთის თავდასხმაა, ხოლო სლოვაკეთი და უნგრეთი უკრაინას ნავთობის მიწოდების განზრახ შეჩერებაში ადანაშაულებენ.
